Izraıl men HAMAS aradaǵy janjalǵa bir-birin kinálap otyr
NUR-SULTAN. QazAqparat – Gaza sektoryndaǵy palestınalyq radıkaldar Izraıl aýmaǵyna jappaı oq jaýdyrdy. Tel-Avıv qalasynyń mańynda zymyran turǵyn úıdiń ústine qulaǵan, saldarynan bir adam qaza tapty. Senbi kúni Izraıl HAMAS-tyń eki komandıriniń úıine jáne Gaza sektorynda birneshe halyqaralyq BAQ-tyń keńsesi ornalasqan ǵımaratqa soqqy jasady. Gaza qalasynan batysqa qaraı ornalasqan Esh-Shaty bosqyndar lagerinde Izraıl soqqysynan 10 adam qaza tapty, dep habarlaıdy QazAqparat Euronews agenttigine silteme jasap.
Evreı memleketiniń premer-mınıstri Benıamın Netanıahý Izraıl armııasynyń radıkaldardyń Gaza sektoryndaǵy ınfraqurylymyna, atap ótkende HAMAS tonnelderine aıtarlyqtaı soqqy salǵanyn málimdedi.
«Siz de bilesiz, men de ony bilemin. Izraıl buǵan shydamaıdy. Biz bul shabýyldarǵa (Gaza sektorynan) jaýap berdik jáne Izraıl azamattarynyń qaýipsizdigi tolyq qalpyna kelmeıinshe osylaı jaýap beretin bolamyz», - dedi Izraıl úkimet basshysy.
Katar astanasy Doha qalasynda Izraılge qarsy aktsııaǵa qatysqan HAMAS kóshbasshysy Ismaıl Hanııa aımaqta bolǵan oqıǵaǵa jaýapkershilikti Izraıldiń ózine júktedi.
«Bul qylmystyq armııa F-16 ushaqtarymen áıelder men balalardy óltirip keledi. Olar halyq qarsylyǵyn ustap tura alamyz dep oılady», - dedi ol.
Palestınalyq taraptyń málimetinshe, janjaldyń alty kúninde 149 adam óltirilgen, sonyń ishinde 41 bala boldy.
Izraıl qaza tapqan 10 adam týraly habarlady. Onyń arasynda ekeýi – bala.
Qaqtyǵystar men tártipsizdikter Iordannyń Batys jaǵalaýynda da toqtamaı jatyr.
Vıfleemde palestınalyq arabtar «Apattar kúnin» (Nakba) atap ótetin 15 mamyrda narazylyq bildirýshiler men ızraıldik arabtar arasynda qaqtyǵys bolǵan.
Áskerıler tas laqtyrǵandardy kózden jas shyǵaratyn gaz seýip taratyp jiberdi.
