Izraıl men AQSh-tyń arasynda saıası janjal týyndaýda
ASTANA. Naýryzdyń 15-i. QazAqparat - Qurama Shtattar Shyǵys Ierýsalım aýmaǵynda taǵy 1,6 myń jańa turǵyn úıdiń qurylysyn maquldaý týraly Izraıldiń sheshimin «qorlaý» dep atady. AQSh Prezıdenti Barak Obamanyń keńesshisi Devıd Akselrod baspasóz máslıhatynda osyndaı málimdeme jasady,
dep habarlaıdy Associated Press.
Oǵan qosa Devıd Akselrodtyń aıtýynsha, Izraıl tarapynyń bul áreketi «aımaqta beıbitshilikke qol jetkizýge baǵyttalǵan AQSh-tyń kúsh-jigerin joq etip otyr».
Osydan birneshe kún buryn Izraıl ókimeti Ierýsalımniń shyǵys bóliginde 1,6 myń jańa úı salý josparyn maquldaǵan bolatyn. Jáne bul habar AQSh vıtse-prezıdenti Djozef Baıdenniń Izraılge sapary kezinde paıda boldy. Ierýsalımnen jetken jańalyqtar Taıaý Shyǵystaǵy jaǵdaıdy turaqtandyrýǵa baǵyttalǵan saıasatymen tanymal Vashıngtonnyń úzildi-kesildi synyna ushyrady. Palestına basshysy Mahmud Abbas ta «qazirgideı jaǵdaıda» Izraılmen tikeleı emes kelissóz júrgizbeıtinin málim etti.
Iordan ózeniniń Batys jaǵalaýy men Shyǵys Ierýsalımde evreı qonystarynyń salynýy Taıaý Shyǵystaǵy qaqtyǵysty retteýdiń basty kedergisi bolyp tabylady. Palestınalyqtar bul aýmaqtardy ózderiniki dep sanaıdy jáne Izraılden barlyq eldimekenderin kóshirip áketýdi talap etýde. Ótken jyldyń qyrkúıek aıynda Izraıl qurylystardy 10 aıǵa toqtatýǵa kelisken bolatyn.
