Izraıl men AQSh álem elderin Trampty Nobel syılyǵyna usynýdy qoldaýǵa shaqyrdy

ASTANA. KAZINFORM – Izraıl Knessetiniń spıkeri Amır Ohana jáne AQSh Ókilder palatasynyń spıkeri Maık Djonson óz áriptesterin AQSh prezıdenti Donald Trampty Nobeldiń Beıbitshilik syılyǵyna usynýdy qoldaýǵa shaqyryp, birlesken bastama jarııalady, dep jazady The Times of Israel.

Bastama Ohananyń Vashıngtonda Djonsonmen kezdesýi barysynda jarııalandy. Kezdesý Nobeldiń Beıbitshilik syılyǵyn tapsyrý rásiminiń qarsańynda ótti. Bıyl bul marapat Venesýela oppozıtsııasynyń kóshbasshysy Marııa Korına Machadoǵa berilýi tıis.

Machadonyń syılyq ıegeri retinde tańdalýy Trampty basty úmitker kóremiz dep kútken saıasatkerler arasynda narazylyq týdyrǵan. Olardyń pikirinshe, Tramp 2025 jyly Gaza sektoryndaǵy soǵysty toqtatýǵa baǵyttalǵan bastamalarymen erekshelengen.

«Biz álemniń barlyq parlamentteriniń spıkerlerin Prezıdent Donald Trampty Nobeldiń Beıbitshilik syılyǵyna usyný jónindegi usynym hatqa qol qoıýǵa shaqyramyz», – delingen Ohana men Djonsonnyń birlesken málimdemesinde.

Olardyń aıtýynsha, Tramp kelesi jylǵa arnalǵan nomınatsııaǵa laıyq, sebebi «memlekettik qyzmetiniń barlyq kezeńinde beıbitshilik týyn kóterip, dıalogty nyǵaıtýǵa beıildiligin kórsetti jáne halyqaralyq arenada kóshbasshylyqtyń úlgisin tanytty».

«Nobel syılyǵynyń bazalyq qaǵıdattaryna sáıkes, 2025 jyly beıbitshilikke eshkim Tramptan artyq úles qospady dep esepteımiz», – dep kórsetilgen málimdemede.

Sonymen qatar, «tarıhta beıbitshilik isin alǵa jyljytý úshin Tramptan kóp eńbek sińirgen adam tabyla qoımaıdy» delingen.

Buǵan deıin Tramp ózin Nobel syılyǵyna usynǵan Ázerbaıjan prezıdentine alǵys aıtty.