Izraıl Lıvannyń ońtústiginde Hezbolla nysandaryna soqqy jasady
ASTANA. KAZINFORM — Lıvan baǵytyndaǵy jaǵdaı qaıta shıelenisip, eki jaq ta bir-birine ne úshin soqqy jasaǵanyn aıtyp jatyr. Bul týraly Kazinform agenttiginiń menshikti tilshisi habarlady.
Juma kúni Izraıl qorǵanys armııasy (TsAHAL) Lıvannyń ońtústiginde ornalasqan shııttik «Hezbolla» uıymynyń nysandaryna, sonyń ishinde onyń elıtalyq «Radvan» bólimshesiniń jattyǵý ortalyǵyna áýeden soqqy jasaǵanyn málimdedi.
Izraıl armııasynyń habarlaýynsha, soqqylar Izraıl áskeri men beıbit turǵyndarǵa qarsy shabýyldardy josparlaý jáne júzege asyrý úshin paıdalanylǵan jattyǵý bazasyna baǵyttalǵan. Atalǵan nysanda jaýyngerler jaýyngerlik atys jattyǵýlarynan ótip, qarý qoldanýdy úırengen.
TsAHAL málimetine sáıkes, sonymen qatar qarý-jaraq saqtaýǵa paıdalanylǵan qosymsha nysandar da joıylǵan.
🔴 Israeli warplanes have carried out an airstrike on the area of Wadi al-Akhdar in Iqlim al-Tuffah and the Sajed hills, according to our correspondent in the South. More than five Israeli warplanes are flying over South Lebanon at a low altitude. pic.twitter.com/DZ2cLhSLBc
— L'Orient Today (@lorienttoday) January 2, 2026
Izraıl áskeri «Hezbollanyń» mundaı áreketi Izraıl men Lıvan arasynda qol jetkizilgen kelisimderdi buzady dep málimdep, uıym tarapynan tónetin qaýip-qaterge qarsy is-qımyldy jalǵastyrýǵa nıetti ekenin atap ótti.
Óz kezeginde Lıvannyń Ulttyq aqparat agenttigi juma kúni jergilikti ýaqyt boıynsha túske taman Izraıl áskerı ushaqtary Djabal ar-Rıhan aımaǵyndaǵy Akmate jazyǵy men Rıhan eldi mekeniniń mańyna birqatar qarqyndy áýe soqqylaryn jasaǵanyn habarlady.
Agenttik dereginshe, birneshe mınýttan keıin Ansar men Zrarıe eldi mekenderiniń arasyndaǵy aýmaqqa «áýe–jer» sanatyndaǵy zymyrandarmen qosymsha soqqylar berilgen. Sondaı-aq Nabatııa okrýgindegi Kfarva men Aazze eldi mekenderiniń arasyndaǵy ańǵarǵa úsh áýe soqqysy jasalǵany aıtyldy.
Qazirgi ýaqytta zardap shekkender men qıraýlardyń aýqymy jóninde aqparat berilgen joq.
Izraıl atysty toqtatý týraly kelisimge qaramastan, Lıvan aýmaǵyna shabýyldaryn jalǵastyryp otyr.
Izraıl Lıvannyń ońtústigindegi «Hezbolla» qarý-jaraq qoımalaryna shabýyl jasaǵanyn jazdyq.