Izraıl Lıvannyń eki aýdanyn úsh apta ishinde berýi múmkin
ASTANA. KAZINFORM — Izraıl Qorǵanys armııasy AQSh-tyń deldaldyǵymen Vashıngtonda qol jetkizilgen negizdemelik kelisim aıasynda Lıvannyń ońtústigindegi eki pılottyq aýdannyń baqylaýyn el armııasyna úsh apta ishinde berýi múmkin, dep habarlaıdy Anadoly.
Izraıldiń KAN memlekettik telearnasynyń málimetinshe, atysty toqtatý rejıminiń saqtalýyn baqylaý komıtetiniń tóraǵasy, amerıkalyq general Djozef Klırfıld Izraılge saparmen barǵan.
Kelesi aptada Klırfıld pen onyń komandasy áskerdi shyǵarý josparyn ázirleý úshin óńirge qaıta keledi. Osydan keıin Izraıl áskeri shyǵarylǵan eki pılottyq aýdannyń baqylaýyn Lıvan armııasyna berý úderisi úsh aptaǵa deıin sozylýy múmkin.
Sondaı-aq Izraıl Qorǵanys armııasy ásker shyǵarylatyn aýdandarǵa qatysty usynys ázirlegen. Bas shtab bastyǵy Eıal Zamır olardy mınıstrler kabınetiniń qaraýyna usynbaq.
Telearna málimetinshe, Izraıl men Lıvan arasyndaǵy qaýipsizdik jónindegi kelisimniń qupııa qosymshasynda atysty toqtatý rejımin birlesip baqylaý tetigin qurý kózdelgen. Bul mehanızm eki el armııalarynyń úılestirýin qamtamasyz etip, sonyń ishinde «Hezbolla» ınfraqurylymyn joıýǵa qatysty is-qımyldardy qamtıdy.
Buǵan qosa, AQSh bul tetikke qatysýshylardyń quramyn bekitip, qupııa aqparattyń «Hezbollaǵa» jetýine jol bermeýdi kózdep otyr. Al 2024 jyly qurylǵan osyndaı tetik aqparattyń tarap ketýine baılanysty tıimsiz bolǵan.
Eske sala keteıik, buǵan deıin Izraıl bıligi Beırýtpen birlesken baqylaý tetigi jóninde kelisimge qol jetkizilgenshe Lıvannyń ońtústigindegi eki pılottyq aýdannan áskerdi shyǵarýdy keıinge qaldyrǵan edi.
AQSh-tyń araǵaıyndyǵymen Beırýt pen Tel-Avıv 26 maýsymda Izraıl áskerin Lıvannyń barlyq okkýpatsııalanǵan aýmaǵynan kezeń-kezeńimen shyǵarý týraly negizdemelik kelisimge qol qoıǵan bolatyn. Kelisimde naqty merzim kórsetilmegen jáne áskerdi shyǵarý Lıvan armııasynyń qaýipsizdikke tolyq jaýapkershilik alýymen ári qarýly toptardy, eń aldymen «Hezbollany» qarýsyzdandyrýmen baılanystyrylǵan.
Aıta ketelik Izraıldiń Lıvanǵa jasaǵan shabýyldarynan qaza tapqandar sany 4 303 adamǵa jetti.
