Izraıl Lıvannan áskerin shyǵarý úshin qosymsha 30 kún surady

ASTANA. KAZINFORM – Sońǵy aptalarda Izraıl Lıvan armııasy shekaralyq aımaqta tym baıaý ornalasyp jatyr degen qorytyndyǵa keldi. Bul Izraıl áskerin Lıvannan shyǵarylýyn keshiktirip, «Hezbollaǵa» qaıta kúsh jınaýǵa múmkindik berýi yqtımal, dep habarlaıdy Kazinform.

Izraıl Amerıka Qurama Shtattarynan Lıvannyń ońtústiginen áskerlerin shyǵarý úshin qosymsha 30 kún suraǵan. Bul Hezbollamen atysty toqtatý kelisiminde belgilengen 60 kúndik merzimnen asyp ketedi.

2024 jyldyń 27 qarashasyndaǵy atysty toqtatý kelisiminiń sharttaryna sáıkes, Izraıl qorǵanys kúshteri (TsAHAL) 26 qańtarǵa deıin Lıvannyń ońtústigindegi barlyq pozıtsııalaryn Lıvan qarýly kúshterine tapsyrýy kerek.

Amerıka Qurama Shtattary jáne Frantsııa deldaldyǵymen jasalǵan kelisim Izraıl áskerleriniń Lıvannyń ońtústiginen ketýin jáne Hezbolladan sodyrlar men qarý-jaraqtardy aımaqtan shyǵarýdy talap etedi. Onyń ornyna Lıvan áskerleri shekaralyq aımaqqa ornalastyrylýy kerek.

Alaıda Izraıl Lıvandaǵy Hezbolla toby kelisimsharttaryn oryndaýǵa asyqpaı jatqanyn aıtyp shaǵymdanýda jáne bul turǵyda naqty progress kerek dep sanaıdy.

TsAHAL Lıvannyń ońtústiginde áreket etetin ızraıldik sarbazdar búgingi kúnge deıin Hezbollaǵa tıesili qarýlar men ınfraqurylymdardy anyqtap jatqanyn aıtty.

Izraıldiń Haaretz daily gazeti AQSh pen Frantsııa Izraıl jáne Lıvan sheneýnikteri suraǵan uzartýdy talqylap jatqanyn habarlady. Eger basqa taraptar kelisse, Frantsııa kelisimdi uzartýda eshqandaı problema kórmeıtinin málimdegen.

Oǵan jaýap retinde Hezbolla barlyq tarapty, sonyń ishinde Lıvan bıligin de, jeksenbi, 26 qańtarda 60 kúndik atysty toqtatý kelisimi aıaqtalǵan soń TsAHAL-ǵa qysym kórsetip, Izraıl áskerleriniń shyǵarylýyn talap etýge shaqyrdy.

Hezbolla «eger Izraıl Lıvannyń ońtústiginde 60 kúnnen artyq qalsa, muny kelisimdi óreskel buzý jáne Lıvannyń egemendigine jasalǵan shabýyl dep sanaıtynyn» málimdegen.

Izraıl kelisim kúni uzarýynan úmitti, sol úshin de áli Lıvannan áskerin shyǵarý týraly sheshim qabyldamaǵan.

– Izraıl men Hezbolla kelisimi 1,2 mıllıonnan astam adamdy óz úıin tastap, bosqynǵa aınaldyrǵan, 3500-den astam adamnyń ómirin qıǵan Izraıldiń Lıvanǵa qurlyqtan shabýylyna núkte qoıdy, – dep habarlaıdy Lıvan Densaýlyq saqtaý mınıstrligi.

Sonymen qatar, qazirgi tańda Izraıl men HAMAS ortasynda Gaza sektoryndaǵy atysty toqtatý kelisimi óz jalǵasyn taýyp jatyr.

Qosa keteıik, Izraıl delegatsııasy Gazadaǵy atysty toqtatý kelisiminiń ekinshi kezeńin jalǵastyrý úshin Kaırge keldi.

Taraptar qazirdiń ózinde alǵashqy kepilderin tutqyndarǵa aıyrbastap úlgerdi.

Izraıl 90 palestınalyq tutqyndy bosatty.

Al Gaza sektorynyń turǵyndary úıindilerdi tazartyp, týystarynyń máıitterin shyǵarýǵa tyrysyp jatyr.

Izraıl batys jaǵalaýyndaǵy Djenın qalasynda lańkestikke qarsy operatsııasyn jalǵastyrýda.