Izraıl Lıvanǵa qaıtadan áýe soqqylaryn jasady
ASTANA. KAZINFORM – Izraıl áskeri atysty toqtatý rejımine qaramastan Lıvannyń ońtústigindegi Nabatııa provıntsııasyna áýe soqqylaryn jasady. Saldarynan úsh adam qaza taýyp, bir adam jaraqat aldy, dep habarlaıdy Anadolu Ajansı.
Izraıl armııasy 17 sáýirde kúshine engen jáne 17 mamyrdan bastap taǵy 45 kúnge uzartylǵan atysty toqtatý týraly kelisimge qaramastan shabýyldaryn jalǵastyryp otyr.
Lıvannyń resmı NNA agenttiginiń málimetinshe, Izraıl áskerı ushaqtary Nabatııa aýdanyndaǵy Dýeır eldi mekenindegi turǵyn úıge eki márte soqqy jasap, ǵımaratty tolyq qıratqan. Sonymen qatar Nabatııa qalasy da áýe shabýylyna ushyrady.
Izraıldiń ushqyshsyz ushý apparaty Nabatııadaǵy Zefta jolynda mototsıklge shabýyl jasap, saldarynan bir adam kóz jumdy.
Taǵy bir jaǵdaıda Abba men Dýeır eldi mekenderiniń arasyndaǵy jolmen kele jatqan mototsıklge jasalǵan dron shabýylynan Sırııanyń eki azamaty qaza taýyp, bir adam jaralandy.
Budan bólek, Izraıldiń taǵy bir ushqyshsyz apparaty Kefýr eldi mekenine soqqy bergen.
– Atysty toqtatý jónindegi kelisimge qaramastan, Izraıl-Lıvan shekarasyndaǵy jaǵdaı áli de kúrdeli kúıinde qalyp otyr, – dep jazdy Anadolu Ajansı.
Aıta keteıik, buǵan deıin Lıvanda Izraıl shabýyldarynan qaza tapqandar sany 3 558 adamǵa jetkeni habarlandy.
