Izraıl Lıvandaǵy Lıtanı ózenindegi kópirdi qıratty
ASTANA. KAZINFORM — Izraıl eldiń ońtústigin ortalyq bóligimen baılanystyryp turǵan mańyzdy kópirdi joıdy. Olar bul áreketke «Hezbolla» jasaqtaryna qarý-jaraq jetkizýdi toqtatý maqsatynda barǵanyn túsindirdi. Lıvan bıligi men quqyq qorǵaýshylar Izraıldi synǵa aldy, dep habarlaıdy DW.
Izraıl áskeri jeksenbi, 22 naýryz kúni Lıtanı ózeni ústindegi, Lıvannyń ońtústigin eldiń ortalyq bóligimen baılanystyratyn jáne aımaqtaǵy mańyzdy nysandardyń biri sanalatyn kópirdi qıratty. Bul Izraıl men Lıvan arasyndaǵy qaqtyǵystyń jańa kezeńge ulasqanyn kórsetedi.
Sol kúni Izraıldiń qorǵanys mınıstri Israel Kats Izraıl qorǵanys armııasyna (TsAHAL) Lıvannyń ońtústik shekarasyna jaqyn aýmaqtaǵy úılerdi buzýdy jedeldetip, Lıtanı ózeni ústindegi barlyq kópirlerdi joıý tapsyrylǵanyn málimdedi. Onyń aıtýynsha, bul «Hezbolla» radıkaldy shııttik qozǵalysyna qarý jetkizýge jol bermeý úshin qajet.
Al TsAHAL Bas shtabynyń bastyǵy, general-leıtenant Eıal Zamır 22 naýryzda «Hezbollaǵa» qarsy qurlyqtaǵy operatsııa aýqymyn keńeıtý josparlanyp otyrǵanyn habarlady.
— «Hezbolla» terrorıstik uıymyna qarsy operatsııa endi ǵana bastaldy, — dep keltiredi onyń sózin AFP agenttigi.
Azamattyq ınfraqurylym nysandarynyń joıylýy Izraıldiń áskerı áreketteriniń aıtarlyqtaı kúsheıgenin bildiredi, dep atap ótti Reuters. Lıvan prezıdenti Djozef Aýn Izraıldiń áreketin aıyptady, al Human Rights Watch uıymy Lıvannyń ońtústigindegi úılerdi súrýin «áskerı qylmys» dep atady.
Izraıldiń Lıvanda kópirlerdi joıýy jáne úılerdi buzýy
Reuters agenttiginiń málimetinshe, sońǵy on kúnde Izraıl Lıvannyń ońtústigindegi birneshe kópirdi qıratqan. Israel Katstyń aıtýynsha, shekara mańyndaǵy eldi mekenderdegi úılerdi buzý Izraıl qaýymdastyqtarynyń qaýipsizdigin qamtamasyz etý úshin qajet. Ol sondaı-aq Gazada osyndaı tásil qoldanylyp, býferlik aımaq qurylǵanyn eske saldy.
Buǵan deıin Izraıl BAQ-tary Lıvan tarapynan atylǵan tankige qarsy snarıadtyń saldarynan Mısgav-Am kıbýtsinde beıbit turǵyn qaza tapqanyn habarlaǵan. Sonymen qatar, Lıvannyń ońtústigindegi shaıqastarda eki ızraıldik áskerı qyzmetker kóz jumdy. Lıvan tarapynyń derekterine sáıkes, Izraıl shabýyldary saldarynan elde 1000-nan astam adam qaza tapqan, olardyń ishinde shamamen 120 bala, 80 áıel jáne 40 medıtsına qyzmetkeri bar. Bul statıstıkada áskerı jáne beıbit turǵyndar jeke kórsetilmegen.
Izraıl men Lıvan arasyndaǵy qaqtyǵystyń shıelenisýi
Naýryz aıynyń basynda Taıaý Shyǵystaǵy jaǵdaıdyń kúrt shıelenisýi aıasynda Lıvan úkimeti «Hezbolla» qozǵalysynyń áskerı áreketterine dereý tyıym salǵan bolatyn. El premer-mınıstri Navaf Salam 2 naýryzdaǵy teleúndeýinde top múshelerin memleketke qarýyn tapsyrýǵa shaqyrdy.
Bul sheshim Iran qoldaıtyn «Hezbolla» qozǵalysy Izraılge qarsy zymyran jáne dron shabýyldaryn jasap, ony Irannyń joǵarǵy kóshbasshysy aıatolla Álı Hameneıdiń qazasyna «kek» retinde túsindirgennen keıin qabyldandy. Izraıl áskeri málimdegendeı, bir zymyran atyp túsirilse, birnesheýi ashyq aımaqtarǵa qulaǵan.
Osy shabýyldardan keıin Izraıl jaýap retinde soqqy jasady. Izraıl áýe kúshteri, atap aıtqanda, «Hezbolla» baqylaýyndaǵy Beırýttyń ońtústik aımaqtaryna qýatty áýe soqqylaryn jasady.
Budan buryn Eýroodaq Lıvandaǵy jaǵdaıǵa qatysty málimdeme jarııalaǵany belgili boldy.