Izraıl Lıvanda shabýyl operatsııasyn bastady

ASTANA. KAZINFORM – Izraıldiń soltústik shekarasyndaǵy shıelenis Beırýt pen Lıvannyń ońtústigindegi nysandarǵa ondaǵan áýe shabýyldarymen aýqymdy operatsııaǵa ulasty, dep habarlaıdy Kazinform-nyń Taıaý Shyǵystaǵy menshikti tilshisi. 

Izraıl qorǵanys armııasy (TsAHAL) eldiń soltústik aýdandaryna túnde jasalǵan zymyran jáne ushqyshsyz ushý apparattarynyń shabýyldarynan keıin lıvandyq «Hezbolla» qozǵalysyna qarsy «shabýyl naýqanyn» bastaǵanyn jarııalady. Izraıl tarapynyń málimetinshe, bul 2024 jyldyń qarashasynda atysty toqtatý týraly kelisimge qol qoıylǵannan beri Lıvan tarapynan jasalǵan alǵashqy shabýyl. 

TsAHAL Bas shtabynyń bastyǵy general-leıtenant Eıal Zamırdiń málimdeýinshe, operatsııa birneshe kúnge sozylýy múmkin.

- Biz «Hezbollaǵa» qarsy shabýyl naýqanyn bastadyq. Biz endi tek qorǵanysta áreket etip qoımaı, shabýyldaıtyn bolamyz. Birneshe kúndik shaıqas pen shabýyldar tolqynyna daıyn bolý kerek, - dep atap ótti ol. 

Izraıl armııasy atqylaýǵa jaýap retinde Beırýt pen Lıvannyń ońtústigindegi «Hezbolla» nysandaryna ondaǵan soqqy jasady. TsAHAL ókili Effı Defrın uıymnyń komandalyq pýnktteri, ushyrý qondyrǵylary jáne ınfraqurylymyna, sondaı-aq joǵary laýazymdy komandırlerge de soqqy jasalǵanyn habarlady.

- «Hezbolla» atys ashyp, shıelenistiń kúsheıý jolyn ózi tańdady. Sol úshin úlken baǵa tóleıdi, - dep málimdedi ol. 

Ol sondaı-aq shabýyldardyń nátıjeleri anyqtalyp jatqanyn jáne operatsııa jalǵasatynyn qosyp ótti. 

Izraıl qorǵanys mınıstri Israel Kats «Hezbollanyń» bas hatshysy Naım Kasem joıylý nysanasyna aınalyp jatqanyn málimdedi.

- «Hezbolla» lańkestik uıymy Izraılge oq atqany úshin úlken baǵa tóleıdi, al Naım Qasym endi aıqyn nysanaǵa aınaldy, - dep jazdy ol áleýmettik jelilerde. 

Lıvan Densaýlyq saqtaý mınıstrliginiń málimetinshe, Izraıl shabýyldarynan kem degende 31 adam qaza taýyp, 149 adam jaraqat alǵan. Vedomstvo olardyń arasynda Hezbollanyń qansha múshesi bar ekenin nemese qansha beıbit turǵyn jaraqat alǵanyn naqtylaǵan joq. Birneshe arab BAQ-tary Beırýt qalasynda «Hezbolla» parlamenttik blogynyń jetekshisi Mohammad Raadtyń qazasy týraly habarlady, alaıda Izraıl bul aqparatty resmı túrde rastaǵan joq.

Izraıl áskerıleri sondaı-aq operatsııanyń keńeıýi múmkin ekenin eskertti. Saýd Arabııasynyń «ál-Hadas» gazeti qaýipsizdik organdaryndaǵy derekkózge silteme jasaı otyryp «Hezbollada eshkim ımmýnıtetke ıe emes», al naýqan jerdegi kezeńdi qosa alǵanda «keń jáne keshendi» bolýy múmkin ekenin málimdedi.

Lıvan prezıdenti Djozef Aýn «Hezbollany» tikeleı atamastan Izraılge jasalǵan zymyran shabýylyn aıyptap, Lıvan aýmaǵyn proksı qaqtyǵystar úshin paıdalaný elge qaýip-qater tóndiretinin jáne Lıvandy aımaqtyq soǵystan aýlaq ustaý kúsh-jigerdi ketiretinin málimdedi. 
TsAHAL Soltústik okrýginiń qolbasshylyǵy Lıvanmen shekarada kúshterdiń aıtarlyqtaı kúsheıtilgenin habarlap, bul rette osy kezeńde eldiń soltústigindegi ızraıldik turǵyndardy evakýatsııalaý jospary joq ekenin atap ótti.

Osyǵan deıin krýızdik kemelerdegi nemis týrısteri Parsy shyǵanaǵynda qalyp qoıǵanyn jazdyq.