Izraıl Lıvan aýmaǵyndaǵy «Hezbolla» nysandaryna soqqy jasady
ASTANA. KAZINFORM – Izraıl áskeri Lıvan aýmaǵyndaǵy «Hezbolla» qozǵalysynyń nysandaryna soqqy berdi. Bul týraly Kazinform agenttiginiń menshikti tilshisi habarlaıdy.
Izraıl qorǵanys armııasy (TsAHAL) beısenbi kúni Lıvannyń ártúrli aımaqtarynda «Hezbolla» qozǵalysyna tıesili nysandarǵa áýeden soqqy jasaǵanyn málimdedi. Soqqyǵa ushyraǵan nysandardyń qatarynda sodyrlardy daıarlaý úshin paıdalanylǵan áskerı lager, sondaı-aq shııttik qozǵalystyń ózge de áskerı ınfraqurylym elementteri bar.
Izraıl tarapynyń málimetinshe, atalǵan lager aýmaǵynda jaýyngerlerdi daıarlaý, oqý-jattyǵý atystary, artıllerııalyq daıyndyq júrgizilgen, sondaı-aq qarý-jaraq saqtalǵan. Áýe soqqylary barysynda zymyran ushyrý qondyrǵylary men TsAHAL terrorıstik ınfraqurylym dep jiktegen nysandar joıylǵan.
Sonymen qatar Izraıl áskeri Lıvan aýmaǵynyń tereńindegi ǵımarattarǵa da soqqy bergen. TsAHAL deregine sáıkes, bul nysandar sońǵy aılarda «Hezbolla» tarapynan qarý saqtaýǵa jáne jedel qyzmet júrgizýge paıdalanylǵan.
Izraıl armııasy ókilderi bul aımaqtarda «Hezbollanyń» áskerı ınfraqurylymynyń bolýy men belsendiligi Izraıl men Lıvan arasyndaǵy atysty toqtatý týraly kelisimderdi buzady jáne Izraıl qaýipsizdigine qater tóndiredi dep málimdedi.
— TsAHAL Izraıl memleketine tónetin kez kelgen qaterdi joıý jáne «Hezbollanyń» áskerı áleýetin qaıta qalpyna keltirýge jol bermeý úshin áreketterin jalǵastyrady, — delingen Izraıl armııasynyń málimdemesinde.
Lıvandyq BAQ málimetinshe, Izraıldiń áýe soqqylary eldiń shyǵys jáne ońtústik aımaqtaryna baǵyttalǵan.
Lıvan parlamentiniń spıkeri Nabıh Berrı Izraıldiń Lıvannyń ońtústigi men Bekaa ańǵary aımaǵyna jasaǵan soqqylaryna pikir bildirip, olardy beısenbi kúni Parıjdegi Elıseı saraıynda ótedi dep josparlanǵan Lıvan armııasyn qoldaýǵa arnalǵan konferentsııaǵa qarsy baǵyttalǵan «ızraıldik belgi» dep atady. Bul týraly L’Orient Today lıvandyq gazeti habarlady.
Atalǵan jıynǵa Lıvan qurlyq áskeri shtabynyń bastyǵy Rodolf Haıkal men AQSh ókili Morgan Ortagýs qatysady dep kútilip otyr.
2024 jylǵy qarashada Izraıl men «Hezbolla» arasynda jasalǵan bitimge qaramastan, Izraıl Lıvan aýmaǵyna soqqy berýdi jalǵastyryp keledi. Sonymen birge ol Lıvannyń ońtústigindegi ózi «strategııalyq mańyzy bar» dep sanaıtyn bes aýdanda áskerin saqtap otyr. Sońǵy shabýyldardyń birinde, qarasha aıynyń sońynda, «Hezbollanyń» shtab bastyǵy qaza tapqan.
Buǵan deıin biz Lıvannyń búgingi kúrdeli syn-qaterleri men «Hezbollany» qarýsyzdandyrýǵa qatysty áreketter jaıynda jazǵan edik.