Izraıl qurlyqta ilgerileı almaı jatyr - Hezbolla jetekshisi

ASTANA. KAZINFORM – Lıvandaǵy «Hezbolla» qozǵalysynyń bas hatshysy Naım Kasem maıdandaǵy jaǵdaıǵa qatysty málimdeme jasap, Izraıl armııasy qurlyqtaǵy operatsııada tabysqa jete almaı otyrǵanyn aıtty, dep habarlaıdy IRNA.

Onyń sózinshe, áýe soqqylarynyń kóptigine qaramastan, qarsy tarap tikeleı shaıqasta kútken nátıjege qol jetkize almaǵan.

– Qarsylas tikeleı qaqtyǵysta tyǵyryqqa tireldi. Ózderi de birneshe ret moıyndaǵandaı, bizdiń jerde eshqandaı qurlyqtyq ilgerileýge qol jetkize almady, – dedi ol.

Sondaı-aq qozǵalys jetekshisi atysty toqtatý jónindegi pikirtalastar aıasynda Lıvan bıligi men halyqaralyq deldaldarǵa úndeý joldady.

– Biz Lıvan múddesine qaıshy keletin burynǵy sharttarǵa eshqashan qaıta oralmaımyz, – dep málimdedi Naım Kasem.

Ol resmı tulǵalardy qarsy tarapqa «tegin jeńildikter» usynýdy toqtatýǵa shaqyryp, kez kelgen dıplomatııalyq qadam naqty áskerı jaǵdaı men qarsylyq kúshteriniń áleýetine negizdelýi tıis ekenin atap ótti.

Aıta keteıik, buǵan deıin AQSh-tyń kelesi aptada Izraıl men Lıvan kezdesýin ótkizetini habarlandy.