Izraıl qosymsha 20 myń áskerı kúshti mobılızatsııalady
ASTANA.KAZINFORM — Izraıl Iranmen qarym-qatynastyń shıelenisýine baılanysty shekaralarda áskerı kúshterin kúsheıtip, rezervısterdi mobılızatsııalaıdy. Izraıldiń Qorǵanys armııasy (TsAHAL) eldiń barlyq shekaralarynda áskerdiń kúshin arttyrý jóninde sharalar qabyldaǵanyn málimdedi.
TsAHAL áskerı jaǵdaıdy baǵalaý nátıjesinde eldiń barlyq shekaralary men aımaqtyq basqarmalarynda qurlyq áskerı kúshterin kúsheıtý jáne arnaıy bólimderdi mobılızatsııalaý týraly sheshim qabyldady. Bul sharalar eldiń túrli qaýip-qaterlerge qarsy daıyndyq deńgeıin arttyrý maqsatynda júzege asyrylyp jatyr.
Iranmen bolǵan operatsııa aıasynda Izraıl áskeri qosymsha 20 myń rezervısti shaqyrdy, olardyń basym bóligi Áýe kúshterinde, áskerı barlaý, Qorǵanys armııasynyń qoldaý bóliminde jáne Áskerı-teńiz kúshterinde qyzmet etedi. Buǵan deıin qyzmetke alynǵan 50 myń rezervısti eskere otyryp, bul kúshterdiń sany arttyryldy.
Sonymen qatar, Izraıldiń Áskerı-áýe kúshteri men Áskerı-teńiz kúshteri de mańyzdy kúshpen kúsheıtilgen. Jarylys tolqynynan paıda bolatyn yqtımal zardaptarǵa jaýap retinde izdestirý-qutqarý bólimsheleriniń birneshe batalondary búkil el boıynsha ornalastyryldy.
🚨 Sirens sounding across Israel pic.twitter.com/qX6OBgNs2k
— Israel Defense Forces (@IDF) February 28, 2026
Izraıldiń medıtsınalyq qyzmetteri Irannyń zymyrandyq soqqylary nátıjesinde eldiń soltústiginde 50 jas shamasyndaǵy er adamnyń jeńil jaraqat alǵanyn habarlady.
Eske sala keteıik, ótken senbide Izraıl men AQSh Iranǵa soqqy bergen edi. Buǵan jaýap retinde Iran Izraıldiń soltústik jáne ortalyq bólikterine zymyrandar atqan bolatyn.
Aıta keteıik, Izraıl búgin Tegeranǵa «preventıvtik soqqy» jasady. Bul týraly Izraıldiń Qorǵanys mınıstri Israel Kats málimdedi.
Osy jaǵdaıǵa baılanysty áýe keńistigi jabylǵannan keıin ushaqtar Irandy aınalyp ótýge májbúr boldy.
Taıaý Shyǵystaǵy jaǵdaıǵa baılanysty Almaty men Astanadan ushyp shyqqan ushaqtar keri oralatyny belgili boldy.
Iran Izraılge qarymta jaýap retinde birneshe zymyran jiberdi.