Izraıl Qorǵanys mınıstri hýsıtterdiń kózin joıatynyn aıtty

ASTANA. KAZINFORM – Izraıl Qorǵanys mınıstri Israel Kats Iemen baskóterýshileriniń «Ansar Allah» uıymynyń kóshbasshysy Abdel Malık al-Hýsıdiń kózin joıatynyn aıtyp, qorqytty.

Armenpress-tiń TASS-qa silteme jasap habarlaýynsha, ol sonymen qatar Iemen astanasy Sanada hýsıtterdiń týynyń ornyna evreı eliniń týy qoıylatynyn jetkizdi.

-Abdel Malık al-Hýsı, seniń ýaqytyń keledi. Sen úkimetińmen jáne ózge zulymdyqtyń ordasyna aınalǵan seriktesterińmen tozaqta jolyǵasyń, - dep jazdy Israel Kats H áleýmettik jelisinde.

-Hýsıtterdiń týyndaǵy «Izraılge ólim, evreılerdi qarǵys atsyn» degen uran kók pen aq tústi Izraıl týyna almastyrylyp, Iemen astanasynda jelbirep turady,-deıdi mınıstr.

Hýsıtter Gaza sektoryndaǵy palestınalyqtardy qoldaý úshin Izraıl aýmaǵyna únemi drondar men ballıstıkalyq zymyrandar ushyryp, sondaı-aq Qyzyl teńizde evreı memleketimen baılanysty júk kemelerine shabýyl jasap keledi.

Oǵan jaýap retinde Izraıl áskerı áýe kúshteri Iemen aýmaǵyndaǵy hýsıt nysandaryna soqqy berip jatyr. 28 tamyzda Sanada jasalǵan áýe shabýyly kezinde hýsıtter qurǵan úkimettiń 11 múshesi qaza tapty.

Osyǵan deıin hýsıtterdiń drony Izraıldiń Eılat kýrortyndaǵy qonaqúıge tıgeni týraly jazdyq.