Izraıl qorǵanys mınıstri Gazada atystyń qaıta jalǵasýy múmkin ekenin málimdedi

ASTANA. KAZINFORM – Izraıl qorǵanys mınıstri Israel Kats HAMAS óz soǵys toptaryn demılıtarızatsııalaý protsesine kedergi jasasa, el áskerleri Gazadaǵy jaýyngerlik áreketterdi qaıta jalǵastyrýy múmkin ekenin aıtty, dep habarlaıdy Kazinform agenttigi TASS-qa silteme jasap.

Agenttiktiń aqparatyna súıensek, eger radıkaldy palestınalyq HAMAS uıymy qarýdan bas tartpaıtyn bolsa, Izraıl Gazadaǵy áskerı áreketterdi qaıta jalǵastyrady. Bul týraly Izraıl qorǵanys mınıstri Israel Kats málimdedi.

«Eger HAMAS (Gazaǵa qatysty beıbit retteý týraly kelisimdi — red.) oryndaýdan bas tartsa, Izraıl AQSh-pen kelisip, HAMAS-ty túgel talqandaýǵa, Gazadaǵy jaǵdaıdy ózgertedi jáne soǵys maqsatynyń barlyǵyna qol jetkizý úshin qaıtadan áskerı áreketterge oralady», — delingen Katstyń keńsesiniń habarlamasynda.

Osyǵan baılanysty Kats áskerge Gazadaǵy urystardy qaıta bastaý qajettigi týyndaǵan jaǵdaıda qoldanatyn «keshendi jospardy» daıyndaýdy tapsyrdy.

Mınıstr kelisimniń Gazadaǵy radıkal qurylymdardy qarýsyzdandyrýdy kózdeıtinin eske saldy, degenmen radıkaldar bul talapty qabyldamaı otyr.

«Tramptyń jospary boıynsha HAMAS ózinde bar barlyq qaza tapqan tutqyndardy (qaldyqtaryn) qaıtaryp, qarýdan bas tartýy tıis, al Izraıl AQSh bastaǵan halyqaralyq kúshtermen birge Gazadaǵy barlyq týnnelderdi jáne terrorıstik ınfraqurylym obektilerin qıratyp, Gazanyń demılıtarızatsııasyn qamtamasyz etip, Izraıl memleketine tónip turǵan kez kelgen qaýipti joıýǵa kirisedi», — dep atap kórsetti Kats.

Aıta keteıik, buǵan deıin Izraıl Gaza sektoryna 45 palestındiktiń máıitin tapsyrdy.

Sondaı-aq AQSh prezıdenti Donald Tramp HAMAS uıymyn kúshpen qarýsyzdandyratynyn málimdedi.