Izraıl qorǵanys mınıstri armııaǵa Gaza turǵyndaryn kóshirýge daıyndalýdy buıyrdy
ASTANA. KAZINFORM – Izraıl qorǵanys vedomstvosynyń basshysy Israel Kats el armııasyna Gaza sektory turǵyndaryn «óz erkimen ketýine» múmkindik beretin jospar ázirleýdi tapsyrdy, dep habarlaıdy Kazinform agenttiginiń menshikti tilshisi.
- Málimdeme prezıdent Tramptyń AQSh-tyń palestınalyq anklavty alý týraly sózinen keıin jarııa etildi, - dep habarlady mınıstr keńsesinen.
Kats «Tramptyń Gaza turǵyndarynyń basym bóligine álemniń ártúrli túpkirine ketýge múmkindik beretin batyl josparyn» qoldap otyr.
- HAMAS Gaza turǵyndaryn tiri qalqan retinde qoldandy jáne turǵyndardyń dál ortasynda terrorlyq ınfraqurylym qurdy. Al endi olardy kepilde ustap, aqshalaryn bopsalap otyr, gýmanıtarlyq kómekti paıdalanady. Olarǵa Gazadan ketýge múmkindik bermeı otyr, - dedi Kats.
Ol áskerılerge kez kelgen nıet etýshi turǵyn ózin qabyldaýǵa kelisken jerge kóshýine múmkindik beretin jospar daıyndaýdy buıyrǵanyn málim etti. Bul oraıda ızraıldik vedomstvo basshysy Ispanııa, Irlandııa, Norvegııa syndy elderdi áleýetti baǵyt retinde naqty atap ótti. Onyń aıtýynsha, bul elder Izraıldiń Gaza sektoryndaǵy HAMAS-qa qarsy soǵysyna baılanysty «jalǵan aıyptaýlar» bildirgen. Ol eger bul elder palestınalyqtardy qabyldaýdan bas tartatyn bolsa, onda «olardyń ekijúzdiligi áshkere bolady» dep otyr.
Sonymen qatar Kats «uıymdastyrylǵan kóshi-qon baǵdarlamasy» bar jáne buǵan deıin «Gaza turǵyndaryn qabyldaýǵa daıyn ekendigin bildirgen» Kanadany da atap ótedi.
Izraıldiń asa ońshyl saıasatkerleri qorǵanys mınıstrliginiń málimdemesin qulshynyspen qabyldap otyr.
- Qorǵanys mınıstrin Gaza turǵyndaryn qabyldaýshy elderge ketýin qamtamasyz etý úshin Izraıldiń qorǵanys armııasyna bizdiń kóshi-qon josparymyzdy daıyndaýdy buıyrý sheshimimen quttyqtaımyn, - dedi Izraıl qarjy mınıstri Betsalel Smotrıch.
Buǵan deıin de Smotrıch Izraıldi Gaza sektoryn jaýlap alýdy jáne anklavtyń 2,2 mln mln turǵynynyń jartysyn 2 jyldyń ishinde kóship ketýdi májbirleýge shaqyrǵan edi.
Buǵan deıin AQSh prezıdenti Donald Tramp AQSh Gaza sektoryn ıemdenýge jáne ony «Taıaý Shyǵystyń Rıverasyna» aınaldyrýǵa daıyn ekendigin málimdedi.
Aıta keteıik, Saýd Arabııasy Gazadan palestınalyqtardy yǵystyrý áreketinen bas tartatyndyǵyn málimdedi.
Mysyr men Iordanııa da palestınalyqtardy kóshirýge qarsy. Tipti eýropalyq kóshbasshylar da Tramptyń palestınalyqtardy kóshirý josparyn synǵa aldy.
Buǵan deıin oqyrman nazaryna shyǵystanýshy shyǵystanýshy Janat Momynqulovtyń Tramptyń Gaza sektoryna qatysty málimdemesine oraı bergen suhbatyn usynǵan edik.