Izraıl Knesseti taratylýy múmkin: zań jobasy aldyn ala daýys berýden ótti
ASTANA. KAZINFORM — Premer-mınıstr Bınıamın Netanıahý bastaǵan Izraıl koalıtsııalyq úkimeti parlamentke Knessetti (parlament) taratý jáne merziminen buryn saılaý ótkizý týraly zań jobasyn usyndy, dep habarlaıdy Anadolu.
Parlamentti taratý týraly zań jobasy bıleýshi koalıtsııadaǵy haredımderdi áskerı qyzmetten bosatý týraly zańǵa qatysty daǵdarystan keıin daýysqa salyndy.
Basylym málimetinshe, Knessettiń jalpy palatasynda aldyn ala daýys berý kezinde parlamenttegi 120 músheniń 110-y zań jobasyn qoldady. Qarsy nemese qalys qalǵandar bolǵan joq. Premer-mınıstr Bınıamın Netanıahýdyń ózi qaýipsizdik máseleleri jónindegi keńeske qatysýyna baılanysty daýys berýge kelgen joq.
Knessettegi koalıtsııa jetekshisi Ofır Kats daýys berýden keıin «koalıtsııa óz mindettemelerin oryndap jatyr» dep málimdedi.
— Osy kezeńde biz toǵyz bıýdjet pen 520 zań qabyldadyq. Qyzmetten bosatý týraly zań jobasyna keletin bolsaq, biz dıalog arqyly qol jetkiziletin jáne Izraıl armııasynyń qajettilikterin eskeretin zań jobasyn engizemiz, — dedi ol.
Netanıahý buǵan deıin koalıtsııa boıynsha ýltraortodoksaldy seriktesterimen (haredımder) mindetti áskerı qyzmet máselesi boıynsha kelisimge kele almaǵan, sodan keıin Knessetti taratý týraly aldyn ala daýys berý týraly sheshim qabyldandy.
Izraıl BAQ habarlaýynsha, Knessetti taratý týraly zań jobasy aldyn ala maquldanǵannan keıin koalıtsııa men oppozıtsııa usynǵan barlyq jobalar biryńǵaı biriktirilgen mátindi daıyndaý úshin parlamenttiń tıisti komıtetine usynylady.
Zańnyń kúshine enýi úshin zań jobasynyń biriktirilgen mátini Knessettiń jalpy otyrysynda taǵy úsh oqylymnan ótýi kerek. Bul rette úshinshi sońǵy oqylym kezinde zań absolıýtti kópshilik — kem degende 61 depýtattyń qoldaýyn qajet etedi.
Baǵalaý boıynsha, bul tehnıkalyq turǵydan 48 saǵat ishinde bolýy múmkin, alaıda koalıtsııa protsesti ádeıi baıaýlatýǵa tyrysyp otyr.
Ýltraortodoksaldy partııalar buǵan deıin saılaýdy qyrkúıektiń basynda ótkizýdi talap etken bolatyn, alaıda Netanıahý ońshyl blokqa qaýip tóndirýden qorqyp, bul kúnge qarsy shyqty.
Eger zań qabyldansa, Izraıldegi merziminen buryn saılaý úsh-bes aı ishinde ótkizilýi tıis.
Merziminen buryn saılaý týraly bastamany Netanıahýdyń ıeshıv stýdentterin áskerı qyzmetten bosatatyn zańdy qabyldaýdan bas tartýyna narazy bolǵan «Degel ha-Tora» ýltraortodoksaldy partııasy kóterdi. Keıinnen Knessetti taratý týraly uqsas zań jobalaryn Avıgdor Lıbermannyń «Bizdiń úıimiz — Izraıl» jáne Naftalı Bennettiń «Bolashaq bar» partııalary usyndy.
