Izraıl qyrkúıektiń ortasynda Gazaǵa shabýylyn bastaýy múmkin

ASTANA. KAZINFORM – Izraıldiń joǵary laýazymdy áskerı ókiliniń sársenbi kúni málimdeýinshe, Gaza qalasyna daıyndalyp jatqan shabýyl Izraıl jańa «gýmanıtarlyq aımaq» qurýdy josparlap otyrǵan mıllıon palestınalyqty yǵystyrýy múmkin, dep habarlaıdy VVS.

BUU baǵalaýynsha, bir mıllıon adam – Gaza qalasy (sektor astanasy) men onyń tóńireginde is júzinde búkil halyq sany. 

Izraıl HAMAS-tyń negizgi bazalary ornalasqanyn alǵa tartyp, qalany tolyq baqylaýǵa alýǵa daıyndalyp jatyr.

Izraıl Qorǵanys mınıstrliginiń Palestına aýmaqtaryndaǵy azamattyq isterdi qadaǵalaıtyn organy COGAT-tyń joǵary laýazymdy ókiliniń sársenbi kúni málimdeýinshe, sońǵy kúnderi Gaza qalasy ornalasqan sektordyń soltústiginen ońtústikke palestınalyqtardyń aıtarlyqtaı kóshýi baıqaldy.

Qazirdiń ózinde soltústik aýdandardan 70 myńǵa jýyq adam ketken.

Osy arada halyqaralyq uıymdar Gazadaǵy eki jyl boıy soǵys kezinde bul aımaq turǵyndarynyń basym kópshiligi, ıaǵnı 2 mln-nan astam adam kem degende bir ret kóshirilgenin eske saldy. 

Izraıl qonys aýdarýshylar úshin qaýipsiz gýmanıtarlyq aımaq qurýǵa ýáde berip otyr, ol týraly jaqyn kúnderi resmı túrde jarııalanady. Qazirgi kezde aımaq sektordyń ortalyq bóliginde shoǵyrlanǵan bosqyndar lagerlerinen ońtústik Ál-Mavası aımaǵyna deıin jáne odan ári shyǵysqa qaraı sozylatyny belgili.

Osy arada halyqaralyq baqylaýshylar Izraıl soǵystyń alǵashqy kúnderinde jaǵalaýdaǵy Ál-Mavası aımaǵyn gýmanıtarlyq aımaq dep jarııalaǵanyn, biraq sodan beri oǵan birneshe ret soqqy jasaǵanyn eske salyp otyr. 

Halyqaralyq Qyzyl Krest uıymy málimdegendeı, belsendi soǵys qımyldary jaǵdaıynda adamdardy kóshirýdiń qaýipsiz joly joq. 

Tamyz aıynyń sońynda Gaza qalasynda asharshylyq bolǵany resmı túrde rastaldy. 
Bul belgili bir aımaqta asharshylyqtyń bar-joǵyn, onyń sıpatyn anyqtaý jáne ony joıý joldaryn usyný maqsaty bolyp tabylatyn BUU agenttikterin, gýmanıtarlyq uıymdar men birneshe eldiń úkimetterin biriktiretin jahandyq bastama – IPC qorytyndysy.

Osy arada Izraıl Gaza qalasyna shabýyl jasaýǵa daıyndalyp jatyr. TsAHAL-ǵa zapastaǵy myńdaǵan jaýynger shaqyryldy. 

Premer-mınıstr Bınıamın Netanıahý úkimeti HAMAS tolyǵymen qarýsyzdandyrylyp, joıylmaıynsha kúsh qoldanatynyn málimdedi.

Izraıl áskeri qazirdiń ózinde Gaza qalasynyń shetine jetti. TsAHAL derekkózderiniń aqparatynsha, qalaǵa shabýyl qyrkúıek aıynyń ortasyna josparlanǵan. 

Izraıldiń qaýipsizdik kabıneti bul jospardy bir aı buryn maquldady. Birinshi kezektegi maqsat – kepilge alynǵan 48 adamdy úılerine qaıtarý, olardyń 20-sy áli tiri dep sanalady.

Izraıldiń Gazadaǵy áreketinen keminde 21 myń bala múgedek bolyp qalǵanyn jazǵan bolatynbyz.