Izraıl kepilge alynǵandardy bosatýdy bitimge kelý sharty retinde qarastyrmaqshy
ASTANA. KAZINFORM — Tel-Avıv atysty toqtatý kelisimin uzartýdy qoldaıdy, biraq taraptar negizgi máselelerde, sonyń ishinde Gaza sektorynyń bolashaǵyna qatysty kelisimge kele almaı otyr, dep habarlaıdy Kazinform tilshisi.
Izraıldiń syrtqy ister mınıstri Gıdeon Saar seısenbide óz eliniń Gaza sektoryndaǵy atysty toqtatýdyń ekinshi kezeńine kóshýge daıyn ekenin aıtty. Bul rette ol HAMAS áli ustap otyrǵan 59 kepilge alynǵandardy bosatýǵa daıyn bolýy tıis ekenin alǵa tartty.
Gaza sektoryndaǵy shaıqas 19 qańtarda AQSh, Qatar men Mysyr elderiniń qoldaýymen qol jetken bitimniń arqasynda aıaqtaldy. HAMAS 33 ızraıldik pen Taılandtyń bes azamatyn 2000-ǵa jýyq palestınalyq tutqynǵa aıyrbastady.
Alaıda, alǵashqy 42 kúndik bitimgershilik kezeńi 1 naýryzda aıaqtaldy, al HAMAS pen Izraıl soǵystan keıingi Gazany basqarý jáne HAMAS tobynyń bolashaǵy syndy jalpy máseleler boıynsha kelisimnen áli de alys.
— Biz ekinshi kezeńge ótýge daıynbyz, — dedi Saar Ierýsalımde. — Biraq ýaqytty uzartý úshin bizge kepilge alynǵan kóptegen adamdy bosatý týraly kelisim qajet.
Izraıl SІM basshysy palestınalyq áskerılendirilgen topty Izraılmen kúresti jalǵastyrý úshin kómek qoldandy dep aıyptap, bul ári qaraı jalǵasa almaıtynyn aıtty.
HAMAS kelissózderdiń ekinshi kezeńine ótýdi qalaıtynyn aıtady. Bul Izraıl áskerleriniń Palestına anklavynan tolyq shyǵarylýymen jáne 2023 jyldyń 7 qazanynda Izraılge jasalǵan shabýylda tutqynǵa alynǵan qalǵan 59 tutqynnyń oralýymen soǵystyń túpkilikti aıaqtalýyna jol ashýy múmkin.
Biraq Izraıl bitimgershilikti uzartý úshin kepilge alynǵan adamdardy kóbirek berý kerek deıdi. Tel-Avıv AQSh prezıdenti Donald Tramptyń Taıaý Shyǵystaǵy Arnaıy Ókili Stıven Ýıtkoff usynǵan jospardy qoldaıdy, ol atysty toqtatý rejımin musylmandardyń naýryzdaǵy Ramazan aıyna deıin jáne 20 sáýirde aıaqtalatyn evreılerdiń pesah meıramy aıaqtalǵanǵa deıin uzartýdy qarastyrady.
Izraıl úkimetiniń ókili Omer Dostrı seısenbi kúni Izraıl HAMAS-tyń Ýıtkoff alǵa tartqan usynysyna kelisýi úshin «birneshe kún» bólip jatqanyn aıtty.
— Eger joq degen jaýap alsaq, kabınet jınalyp, kelesi qadamǵa kóshý týraly sheshim qabyldaıdy, — dep qorqytty Dostrı.
Ótken aptada Memlekettik departament Ýıtkoff aldaǵy birneshe kúnde atysty toqtatý rejımin uzartýdy nemese ekinshi kezeńge ótýdi talqylaý úshin Taıaý Shyǵys aımaǵyna barýy kerek dep habarlady.
Kelesi kúni HAMAS Izraıldi ekinshi kezeńdegi kelissózderdiń bastalýyn keshiktirdi dep aıyptady. Keıinirek Izraıl Gaza sektoryna gýmanıtarlyq kómek pen júk kólikteriniń kirýine tosqaýyl qoıdy. Sondaı-aq, ol anklavtaǵy elektr qýatyn óshirip, HAMAS-qa qysymnyń kúsheıýi aıasynda soǵysty qaıta bastaýy múmkin ekendigi týraly habarlady.