Izraıl Qazaqstanmen tikeleı áýe qatynasyn ashýǵa múddeli - Itshak Gertsog
ASTANA. KAZINFORM – Qasym-Jomart Toqaevpen keńeıtilgen quramda ótken kelissóz barysynda Itshak Gertsog Qazaqstan men Izraıl arasyndaǵy áriptestik qarqyndy damyp kele jatqanyn aıtty, dep habarlaıdy Aqordanyń baspasóz qyzmeti.
– Prezıdent myrza, Qazaqstan toleranttylyq pen konfessııaaralyq dıalogtyń biregeı úlgisin kórsetip otyr. Sol úshin Sizge alǵys aıtamyn. Sonymen qatar eki el arasyndaǵy iskerlik baılanystar men taýar aınalymyn arttyrýǵa múmkindik mol ekenine nazar aýdarǵym keledi. Bul baǵytta naqty sharalar qabyldaı alamyz. Atap aıtqanda, biz tikeleı áýe qatynasyn ashýǵa múddelimiz. Ol iskerlik jáne saýda qatynastaryna oń yqpal etedi. Budan bólek, ekijaqty quqyqtyq-kelisimshart bazasyn keńeıtýge nıettimiz. Qazirgi kezde birqatar kelisim, sonyń ishinde qosarlanǵan salyqty alyp tastaý týraly ýaǵdalastyq pysyqtalyp jatyr, – dedi Izraıl Prezıdenti.
Memleketter basshylary óńirlik jáne halyqaralyq ózekti máseleler jóninde pikir almasty.
Kelissóz qorytyndysy boıynsha taraptar turaqty saıası dıalogty jalǵastyrýǵa, barlyq deńgeıdegi yqpaldastyqty jandandyrýǵa, sondaı-aq birlese kúsh jumyldyra otyryp seriktestikti jańa ári sapaly kezeńge shyǵarýǵa kelisti.
Osyǵan deıin Qazaqstan men Izraıl Prezıdentteri keńeıtilgen quramda kelissóz júrgizgeni týraly jazdyq.