Izraıl Qazaqstanda sý qoımalarynyń qurylysyna ınvestıtsııa salýǵa nıetti
ASTANA. KAZINFORM – Sý resýrstary jáne ırrıgatsııa mınıstri Nurjan Nurjigitov Izraıldiń iri kompanııalarymen kelissóz júrgizdi. Bul týraly vedomstvonyń baspasóz qyzmeti málim etti.
Sý resýrstary jáne ırrıgatsııa mınıstri Nurjan Nurjigitov Value LBH kompanııasynyń basqarýshy seriktesi jáne Dan Capital ınvestıtsııalyq kompanııasynyń basqarma tóraǵasy Shımon Ben Hamo bastaǵan sý resýrstaryn basqarý salasyndaǵy jetekshi ızraıldik kompanııalardyń konsortsıýmymen kezdesti.
«Taraptar sý salasynyń túrli baǵyttary boıynsha yntymaqtastyq múmkindikterin talqylady. Atap aıtqanda, sý sharýashylyǵy nysandaryn salý jáne rekonstrýktsııalaý, birlesip kadr daıarlaý jóninde sóılesti», — delingen habarlamada.
Izraıldik bıznesmender Qazaqstanda sý qoımalaryn salý jáne rekonstrýktsııalaý jumystaryna ınvestor retinde qatysýǵa daıyn ekendikterin bildirdi. Budan bólek, ızraıl kompanııalary sý tasqynyn boljaý jáne odan qorǵanýdyń zamanaýı júıelerin usynýǵa daıyn.
Sonymen qatar, taraptar sý únemdeý tehnologııalaryn engizý, sýdy tazartý jáne qaıta paıdalaný, aýyz sýdyń sapasyn baqylaý, sý resýrstaryn bólý men esepke alýdy avtomattandyrý máseleleri boıynsha da seriktestik ornatý jóninde áńgimelesti.
Nurjan Nurjigitov kadr daıarlaý máselesine jeke toqtalyp, elimizdegi sý sharýashylyǵy mamandarynyń biliktiligin arttyrý boıynsha birlesken baǵdarlama ázirleý jóninde bastama kóterdi. Sondaı-aq, josparlanǵan jobalar boıynsha jumys tobyn qurýdy usyndy.
«Biz nátıjeli yntymaqtastyqqa nıettimiz. Izraıldik kompanııalardyń sýdy sapaly basqarýda mol tájirıbesi men zamanaýı tehnologııalary bar. Keıbir kompanııalar Qazaqstanda burynnan beri tabysty jumys istep keledi. Biz barlyq salada sýdy barynsha tıimdi paıdalanýǵa nıettimiz, sondyqtan seriktestigimiz ózara tıimdi bolatynyna senimimiz mol», — dedi Sý resýrstary jáne ırrıgatsııa mınıstri Nurjan Nurjigitov.
