Izraıl IRSK «bas nasıhatshysynyń» qaza tapqanyn rastady
ASTANA. KAZINFORM - Izraıl qorǵanys armııasy Islam revolıýtsııasy saqshylar korpýsynyń (IRSK) baspasóz hatshysy, general Álı Mohammad Naınıdiń qaza tapqanyn rastady, dep habarlaıdy DW.
Áskerı málimetke sáıkes, ol Izraıl áskerı-áýe kúshteriniń soqqysy nátıjesinde kóz jumǵan. Buǵan deıin onyń ólimi týraly Irannyń memlekettik BAQ-tary da habarlaǵan.
TsAHAL dereginshe, áýe soqqysy 20 naýryzǵa qaraǵan túni barlaý málimetteri negizinde jasalǵan.
Izraıl áskeri Naınıdi Iran bıliginiń «negizgi nasıhatshylarynyń biri» dep sıpattady.
Málimdemede onyń uzaq jyldar boıy aqparattyq saıasat pen qoǵammen baılanys salasynda túrli qyzmet atqarǵany aıtylǵan. Sońǵy eki jylda ol IRSK quramynda basty nasıhatshy rólin atqarǵan.
TsAHAL málimetinshe, Naını Taıaý Shyǵystaǵy Iranǵa jaqyn kúshter arasynda úgit-nasıhat júrgizip, Izraılge qarsy ártúrli baǵyttardan shabýyldardy úılestirýge yqpal etken.
Izraıl tarapy onyń joıylýyn Iran basshylyǵyndaǵy ondaǵan joǵary laýazymdy tulǵany joıýǵa baǵyttalǵan operatsııanyń bir bóligi dep atady. Áskerıler mundaı áreketter aldaǵy ýaqytta da jalǵasatynyn málimdedi.
Buǵan deıin Irannyń Tasnim agenttigi de Naınıdiń qaza tapqanyn rastap, ony «sheıit bolǵan» dep ataǵan.
AQSh pen Izraıldiń Iranǵa qarsy soǵysy
28 aqpannan bastap AQSh pen Izraıl Iran aýmaǵyna áýeden soqqy jasap keledi. Bul shabýyldar nátıjesinde Irannyń joǵarǵy kóshbasshysy aıatolla Álı Hameneı jáne birqatar joǵary laýazymdy tulǵalar men kúshtik qurylym ókilderi qaza tapqany habarlanǵan.
Iran buǵan jaýap retinde Parsy shyǵanaǵy aımaǵyndaǵy elderge zymyrandar men drondar arqyly soqqy jasap jatyr.
Resmı málimet boıynsha, bul shabýyldardyń negizgi nysanasy — aımaqtaǵy amerıkalyq áskerı bazalar.
Sonymen qatar Iran soqqylary birqatar eldegi munaı qoımalary men munaı tankerlerine de tıgen.
Soǵys bastalǵaly Iran shabýyldarynan Ázerbaıjan men Eýropalyq odaq quramyndaǵy Kıpr de zardap shekkeni aıtyldy.
Osyǵan deıin Izraıl Irannyń barlaý mınıstri óltirilgenin jarııalady.
