Izraıl Irannyń barlaý mınıstri óltirilgenin jarııalady
ASTANA. KAZINFORM – Izraıl Iran nysandaryna shabýyldardy kúsheıtetinin jarııalap, qaqtyǵystyń ýshyǵýy aıasynda jańa «tosynsyılar» bolatynyn ýáde etti, dep habarlaıdy Kazinform-nyń Taıaý Shyǵystaǵy menshikti tilshisi.
Izraıldiń qorǵanys mınıstri Israel Kats sársenbi kúni Tegeranda túnde jasalǵan áýe shabýyly kezinde Irannyń barlaý mınıstri Esmaıl Hatıbtiń qaza tapqanyn málimdedi.
Onyń aıtýynsha, Izraıldiń Iran aýmaǵyna shabýyldarynyń qarqyny kúsheıe tústi jáne jaqyn arada qaqtyǵysty ýshyqtyrýy múmkin jańa áreketter kútilip otyr.
- Bul kúni barlyq baǵyttar boıynsha eleýli «tosynsyılar» kútilip otyr, bul bizdiń Lıvandaǵy Iran men «Hezbollaǵa» qarsy júrgizip jatqan soǵysymyzǵa serpin beredi, - dep málimdedi Kats qaýipsizdik máseleleri jónindegi keńes barysynda.
Ol sondaı-aq Izraıl premer-mınıstri Bınıamın Netanıahýmen birlesip, Izraıl qorǵanys kúshterine kez kelgen joǵary laýazymdy ırandyq sheneýnikti qosymsha maquldaýdy qajet etpeı óltirýge ruqsat berý týraly sheshim qabyldanǵanyn atap ótti.
Iran bıligi ázirge Esmaıl Hatıbtiń ólimi týraly habarlamalardy rastaǵan joq.
Izraıl qorǵanys armııasy (TsAHAL) 2021 jyldan beri barlaý mınıstri qyzmetin atqaryp kele jatqan Hatıbtiń Iran astanasynda Izraıl áskerı-áýe kúshteri shabýylynyń nysanasy bolǵanyn rastady. Izraıl áskerıleriniń málimetinshe, Irannyń barlaý mınıstrligi barlaý, baqylaý, tyńshylyq jáne sheteldegi operatsııalarǵa jaýapty negizgi mekeme.
- Barlaý mınıstrligi rejımniń repressııa saıasaty men terrorıstik áreketterin qoldaýda ortalyq ról atqarady, - delingen armııa málimdemesinde.
TsAHAL málimetinshe, Hatıb Irandaǵy narazylyq aktsııalaryn, sonyń ishinde Mahsa Amınıdiń óliminen keıin 2022-2023 jyldardaǵy narazylyq aktsııalaryn basýǵa belsendi qatysty, sondaı-aq Izraıl men Amerıka nysandaryna qarsy operatsııalardy úılestirdi.
Iran BAQ-nyń habarlaýynsha, sársenbide Izraıldiń aldyńǵy kúni jasaǵan shabýyldarynan qaza tapqan joǵary laýazymdy sheneýnikterdi, sonyń ishinde Joǵarǵy Ulttyq qaýipsizdik keńesiniń hatshysy Álı Larıdjanı men «Basıdj» qurylymynyń basshysy Golamreza Súleımanıdi jerleý rásimi ótip jatyr.
Osyǵan deıin Izraıl Iranǵa áýeden shabýyldar kezinde Álı Larıdjanıdiń qaza tapqanyn jarııalaǵan bolatyn.
