Izraıl Iranmen soǵys kezinde Hameneıdi joıýdy josparlaǵan, biraq operatsııa jasalmady

ASTANA.KAZINFORM - Jaqynda bolǵan qaqtyǵys kezinde Izraıl Irannyń Joǵarǵy Kóshbasshysyn joıýdy kózdegen, biraq operatsııany júzege asyra almady, dep habarlaıdy Kazinform tilshisi.

Izraıl Qorǵanys mınıstri Israel Kats beısenbi kúni Izraıldiń 13 arnasyna Tel-Avıvtiń Iranmen 12 kúndik soǵysy kezinde Aıatolla Álı Hameneıdi joıý múmkindigin qarastyryp jatqanyn aıtty.

- Eger ol bizdiń kóz aldymyzda bolsa, biz ony joıyp jiberer edik, - dedi Kats. - Biz Hameneıdi joıǵymyz keldi, biraq operatsııalyq múmkindik bolmady.

Onyń aıtýynsha, Iran basshysy tereń astyrtyn áreketke túsip, Islam revolıýtsııasy Saqshylar korpýsynyń jańa qolbasshylarymen baılanysyn úzip, mundaı operatsııany júzege asyrý múmkin emes boldy.

- Hameneı óziniń nysanaǵa ilikkenin túsinip, jasyrynýǵa kiristi. Ol joıylǵandardyń ornyna kelgen ofıtserlermen baılanysyn úzdi, - dep túsindirdi mınıstr.

Áleýetti operatsııa Vashıngtonmen kelisildi me degen suraqqa Kats: «Bizge mundaı áreketterge ruqsat qajet emes», - dep basa aıtty.

Iran men Izraıl arasyndaǵy qaqtyǵys 13-24 maýsym aralyǵynda jalǵasty.

Soǵystyń alǵashqy kúnderinde Izraıl armııasy Iran terrıtorııasyna soqqy berip, joǵary laýazymdy áskerı sheneýnikterdi jáne ıadrolyq baǵdarlamaǵa qatysy bar mamandardy óltirdi.

Izraıl premer-mınıstri Bınıamın Netanıahý men AQSh prezıdenti Donald Tramp «Tegerandaǵy rejımdi ózgertý» múmkindigi týraly málimdeme jasady.

AQSh tarapynyń aralasýynan, AQSh-tyń Irannyń ıadrolyq nysandaryna soqqy berýinen jáne Irannyń Qatardaǵy amerıkalyq bazaǵa jaýap soqqysynan keıin shaıqas toqtatyldy.

Beısenbi kúni aıatolla Álı Hameneı teledıdar arqyly halyqqa sóılegen sózinde Irannyń ózin-ózi qorǵaý áreketinde Izraıl men AQSh-qa aýyr soqqy bergenin aıtty.