Izraıl Iranmen atysty toqtatýǵa kelisti, biraq shart buzylsa qatań jaýap beretinin eskertti

ASTANA. KAZINFORM – Izraıl AQSh-tyń Iranmen ekijaqty atysty toqtatý týraly usynysyna kelisti. Alaıda kelisim sharty buzylǵan jaǵdaıda jedel ári qatań jaýap beriletinin eskertti. Bul týraly seısenbi kúni tańerteń jarııalanǵan premer-mınıstr keńsesiniń málimdemesinde aıtylǵan, dep haarlaıdy Kazinform menshikti tilshisi.

Premer-mınıstr Bınıamın Netanıahý Qorǵanys mınıstri, Izraıl Qorǵanys armııasy (TsAHAL) Bas shtabynyń bastyǵy jáne «Mossad» barlaý qyzmetiniń basshysymen jınalys ótkizip, «Qaısar Arystan» operatsııasy aıasyndaǵy barlyq áskerı mindetterdiń oryndalǵanyn jáne odan da aýqymdy nátıjelerge qol jetkizilgenin habarlady.

— Izraıl qos ekzıstentsııalyq qaterdi — ıadrolyq jáne ballıstıkalyq zymyrandar salasyndaǵy qaýipterdi joıdy, — delingen resmı málimdemede.

Aqparatqa sáıkes, TsAHAL Tegeran ústindegi áýe keńistiginde tolyq ústemdik ornatyp, Irannyń áskerı basshylyǵyna soqqy jasap, rejımge tıesili ondaǵan mańyzdy nysandy joıǵan. Sonymen qatar Izraıl Irannyń joǵary laýazymdy ıadrolyq fızıgin joıǵanyn alǵash ret resmı túrde málimdedi.

Málimdeme keıingi táýlikterde «Basıdj» (IIRSQ quramyna kiretin erikti qaýipsizdik kúshteri) uıymynyń júzdegen múshesiniń kózi joıylyp, Iran astanasyndaǵy sheshim qabyldaý ortalyǵyna soqqy jasalǵanyn aıtylǵan.

— Izraıl ıadrolyq qaýiptiń joıylýyna qoldaý kórsetkeni úshin AQSh prezıdenti Donald Tramp pen Amerıka Qurama Shtattaryna alǵys bildiredi, — dep kórsetilgen qujatta.

TsAHAL ókili, brıgadalyq general Efı Defrın Izraıl armııasynyń barlyq qoıylǵan maqsattarǵa qol jetkizgenin, alaıda ylǵı daıyndyqta bolatynyn atap ótti.

— Bas shtab bastyǵy atysty toqtatý sharttary buzylǵan jaǵdaıda dereý jaýap berýge tolyq daıyn bolýdy tapsyrdy, — dedi ol.

Premer-mınıstr keńsesi azamattardy jaǵdaı tolyq turaqtalǵanǵa deıin tyl basqarmasynyń nusqaýlaryn saqtaýǵa shaqyrdy. Bınıamın Netanıahý aldaǵy ýaqytta málimdeme jasaýy yqtımal.

Dúısenbi kúni AQSh prezıdenti Donald Tramp Izraıl men Iran arasyndaǵy atystyń tolyq toqtatylǵanyn jarııalaǵan bolatyn.

Al Iran Izraılmen atysty toqtatý rejımi kúshine engenin málimdedi.