Izraıl Iranǵa taǵy soqqy jasap jatyr

ASTANA. KAZINFORM - Izraıl armııasynyń ókili Effı Defrın brıfıngte osy saǵattarda Izraıl áskerı-áýe kúshteri Irannyń ár túkpirinde úlken soqqy jasaýdy jalǵastyryp jatqanyn aıtty, - dep habarlaıdy VVS.

Onyń aıtýynsha, soqqy 40 saǵatqa jýyq ýaqyt boıy jalǵasyp jatyr, osy ýaqyt ishinde 150-den astam nysanaǵa shabýyl jasaldy. Sońǵy 24 saǵatta soqqylardyń basty nazary Tegeran bolyp otyr.

Defrın sonymen qatar Irannyń batysyndaǵy jerasty nysanyna shabýyl jasalǵanyn habarlady. Onyń aıtýynsha, onda qanatty jáne ballıstıkalyq zymyrandar saqtalyp, Izraılge ushyrylǵan.

Iran tarapynan «Tasnım» agenttigi jýyrda astanada jáne kóptegen aımaqta áýe qorǵanysy qaıta iske qosylǵanyn habarlaǵan.

Sondaı-aq bir kúnde eldiń batysynda jáne Irannyń ortalyǵyndaǵy Kom qalasynyń aımaǵynda Izraıldiń kóptegen ushqyshsyz ushaǵy atyp túsirilgenin jazdy.

Eske sala keteıik, juma, 13 maýsymǵa qaraǵan túni Izraıl Iranǵa jappaı soqqy berdi. Buǵan jaýap retinde Tegeran Izraılge qaraı júzden astam dron ushyrdy. Iran Natanzedegi ıadrolyq qondyrǵynyń zaqymdanǵanyn rastady, biraq radıatsııanyń aǵyp ketkenin joqqa shyǵardy.

Iran Izraılge zymyran soqqylarynyń jańa tolqynyn bastady. Izraıldiń Tótenshe jaǵdaılar qyzmeti habarlaǵandaı, ırandyq zymyran atysynan eki adam qaza tapty – shamamen 60 jastaǵy áıel jáne 45 jastaǵy er adam. Taǵy 19 adam jaraqat aldy, dep habarlady Izraıldiń jedel járdem qyzmeti.

Irannyń BUU-daǵy ókili Izraıldiń áýe shabýyly saldarynan 78 adamnyń qaza tapqanyn aıtqan bolatyn. Iranda 320-dan astam adam jaraqat aldy.

Buǵan deıin Iran joǵary shendi áskerı qolbasshylar men jetekshi ǵalymdardyń Izraıl soqqysy saldarynan qaza tapqanyn rastady.

Iran Izraıl shabýylynan keıin Ormýz buǵazyn jabaıyn dep jatyr.

Iran-AQSh kelissózderine deldal bolyp júrgen Oman Syrtqy ister mınıstri Badr ál-Býsaıdı jeksenbi kúni Maskatta ótýi josparlanǵan kelissóz ótpeıtinin rastady.