Izraıl Iranǵa soqqy berip, áýe keńistigin jaýyp tastady
ASTANA. KAZINFORM — 13 maýsymǵa qaraǵan túni Izraıldiń ÁÁK (áskerı-áýe kúshteri) Iranǵa soqqy jasady. Tegeranda jarylystardyń dybysy estildi. Izraıl tótenshe jaǵdaı rejımin jarııalap, óziniń áýe keńistigin japty, dep jazdy DW.
Izraıldiń qorǵanys mınıstri Israel Katstyń aıtýynsha, bul «aldyn alý soqqysy» bolǵanyn Reuters agenttigi habarlady. AFP agenttiginiń málimetinshe, Izraıl elde tótenshe jaǵdaı rejımin engizdi.
— Izraıl memleketi Iranǵa aldyn ala soqqy jasaǵannan keıin, jaqyn arada Izraılge men onyń beıbit turǵyndaryna zymyran sondaı-aq dron shabýyldary jasalady dep boljanyp otyr, — dedi Kats The Times of Israel basylymyna bergen suhbatynda.
Irannyń memlekettik teledıdary habarlaǵandaı, «Tegeran astanasynyń ártúrli bólikterinde qatty jarylystardyń dybysy estildi». Sondaı-aq, Irannyń áýe qorǵanys júıesi tolyq jaýyngerlik daıyndyqqa keltirilgeni jáne Imam Homeını atyndaǵy halyqaralyq áýejaıda barlyq qatynas toqtatylǵany habarlandy.
Izraıl de óz áýe keńistigin japty.
TsAHAL: Operatsııa Irannyń ıadrolyq baǵdarlamasyna qarsy baǵyttalǵan
Izraıldiń Qorǵanys armııasy (TsAHAL) Irannyń ıadrolyq baǵdarlamasyna qarsy «Arystan halqy» kodtyq ataýymen operatsııa bastaǵanyn rastady.
The Times of Israel málimetinshe, TsAHAL Iranda birneshe kún ishinde 15 ıadrolyq bomba jasaýǵa jetetin baıytylǵan ýran bar ekenin aıtyp, bul «asa qaýipti qaýipke» qarsy shara qoldanýǵa májbúr ekenin málimdedi.
Izraıl Irandaǵy ondaǵan nysanǵa soqqy jasady
Izraıldiń ÁÁK Iran aýmaǵyndaǵy ıadrolyq baǵdarlamaǵa jáne basqa da áskerı nysandarǵa baılanysty ondaǵan nysandy soqqyǵa aldy. Reuters agenttigi habarlaǵandaı, jarylystardyń dybysy Natanz qalasyndaǵy Irannyń ıadrolyq nysany mańynda da estilgen.
— Irannyń ıadrolyq otyndy baıytý baǵdarlamasynyń dál ózegine soqqy jasadyq. Sonymen qatar, biz Irannyń ballıstıkalyq zymyran baǵdarlamasynyń ortalyǵyna da soqqy berdik. Irannyń bizge zııan keltirý múmkindigi áli de bar. Operatsııa qajetti bolǵansha jalǵasady — dedi Izraıl premer-mınıstri Bınıamın Netanıahý.
Aqparat agenttikteriniń (sonyń ishinde Reuters) habarlaýynsha, Izraıldiń ÁÁK Irandaǵy ıadrolyq jáne áskerı nysandardan bólek, Islam Respýblıkasynyń áskerı jáne ǵylymı basshylyǵyna baǵyttalǵan núktelik soqqylar jasaǵan. Atap aıtqanda, Islam revolıýtsııasy saqshylar korpýsynyń (KSIR) shtab bastyǵy Hosseın Salamı men ıadrolyq fızıkter Fereıdýn Abbası-Davanı men Mohammad Mehdı Tehranchıdiń qaza tapqany týraly habarlandy.
Eske sala keteıik, buǵan deıin Izraıl Iemenniń Hodeıda portyna soqqy bergenin jazǵan edik.