Izraıl Iranǵa shabýyldaryn toqtatqanymen Lıvandaǵy operatsııalaryn jalǵastyryp otyr
ASTANA. KAZINFORM — Izraıl armııasy bitim jasasý aıasynda Iranǵa shabýylyn toqtatqanyn málimdedi, alaıda Lıvanda «Hezbollaǵa» qarsy áskerı operatsııalar jalǵasyp jatyr, dep habarlaıdy Kazinform-nyń Taıaý Shyǵystaǵy menshikti tilshisi.
Izraıl qorǵanys armııasy sársenbi kúni eldiń áskerı-áýe kúshteri Iran aýmaǵyna soqqy berýdi toqtatqanyn, Irannyń Izraılge qarsy ballıstıkalyq zymyran ushyrý qarqynyn azaıtýǵa baǵyttalǵan túngi shabýyldar serııasyn aıaqtaǵanyn habarlady.
Sondaı-aq atysty toqtatý týraly kelisim kúshine engenge deıin Izraıl kúshteri Irannyń ártúrli bólikterindegi negizgi qarý-jaraq óndirisi nysandaryna shabýyl jasaǵany týraly habarlandy.
— Saıası basshylyqtyń nusqaýlaryna sáıkes armııa Iranǵa qarsy naýqandy toqtatty jáne joǵary daıyndyqta qalyp, kez kelgen buzýshylyqqa jaýap berýge daıyn, — delingen TsAHAL málimdemesinde.
Izraıl áskerıleri sonymen birge Lıvandaǵy «Hezbollaǵa» qarsy operatsııalar, sonyń ishinde jerdegi is-áreketter jalǵasyp jatqanyn rastady. Armııa atysty toqtatýdyń Lıvan baǵytyna qoldanylmaıtynyn atap ótti.
Izraıl armııasynyń málimdemesi Pákistan premer-mınıstri Shahbaz Sharıftiń buryn qol jetkizilgen kelisimderdiń Lıvanǵa da qatysty ekeni týraly málimdemesine qaramastan jasaldy, alaıda Izraıl tarapy bul málimdemeni joqqa shyǵardy.
Izraıl premer-mınıstri Bınıamın Netanıahý AQSh prezıdenti Donald Tramptyń Iranǵa qarsy soqqylardy toqtatý týraly sheshimin quptady. Osy arada Izraıl bıligi bul kelisim Lıvanǵa qatysty qoldanylmaıdy dep sanap otyr.
— Eki aptalyq bitim Lıvandy qamtymaıdy, — dep málimdedi Izraıl úkimeti basshysynyń keńsesi.
Málimdemede sondaı-aq AQSh Izraılge Iranmen aldaǵy kelissózde ortaq maqsattarǵa jetýge, sonyń ishinde ıadrolyq jáne zymyran qaýpin joıýǵa mindettemesin rastaǵany atap ótildi.
Frantsııa prezıdenti Emmanıýel Makron AQSh pen Iran arasynda atystyń toqtatylýyn quptady, biraq atysty toqtatý týraly kelisimge Lıvan da kirýi kerek ekenin málimdep, Taıaý Shyǵystaǵy bul elde jaǵdaıdyń óte kúrdeli ekenin eskertti.
Eske sala ketsek, AQSh prezıdenti Donald Tramp Iranǵa soqqylardy ýaqytsha toqtatýǵa daıyn ekenin málimdegennen keıin, Tegeran eki aptalyq bitim sharttaryn qabyldady.
