Izraıl Iranǵa qaıta soqqy jasaýǵa daıyn ekenin málimdedi
ASTANA. KAZINFORM – Izraıl áskeri jańa qaýipter týyndaǵan jaǵdaıda Iranǵa qarsy áskerı operatsııany qaıta bastaýǵa daıyn ekenin málimdedi, dep habarlaıdy Kazinform agenttiginiń menshikti tilshisi.
Izraıl qorǵanys mınıstri Israel Kats beısenbi kúni ótken áskerı rásim barysynda el armııasy qaýipsizdikke tónetin qaterlerdi joıý úshin qajet bolǵan jaǵdaıda Iran aýmaǵyna qaıta soqqy jasaýǵa daıyn ekenin aıtty.
– Armııa áýedegi basymdyqty qaıta ornatyp, qaýipterdi joıý úshin Iranǵa soqqy berýge jáne qajet bolsa, úshinshi ret te áreket etýge daıyn. Eger bizge qaıta oralý qajet bolsa, burynǵydan da qýatty kúshpen oralamyz, – dedi Kats.
Sol rásimde sóz sóılegen Izraıl premer-mınıstri Bınıamın Netanıahý buǵan deıingi eki áskerı naýqan nátıjesinde Iran aıtarlyqtaı álsiredi dep málimdedi.
– Iran osi qazir burynǵydan álsiz, al Izraıl burynǵydan da kúshti. Biz Izraıl áskerı-áýe kúshteri Iemennen Iranǵa deıin kez kelgen núktege jete alatynyn dáleldedik. Degenmen bul naýqan áli aıaqtalmaǵanyn moıyndaýymyz kerek, – dedi Izraıl premer-mınıstri.
Izraıl basshylyǵynyń málimdemeleri AQSh pen Iran arasyndaǵy jańa shıelenis jaǵdaıynda jasaldy.
Ormýz buǵazy aımaǵyndaǵy ózara soqqylardan keıin AQSh prezıdenti Donald Tramp Vashıngton men Tegeran arasyndaǵy ózara túsinistik týraly memorandým kúshin joıdy dep sanaıtynyn aıtty.
The Times of Israel jáne The New York Post basylymdarynyń habarlaýynsha, Izraıl basshylyǵy Vashıngton tıisti sheshim qabyldaǵan jaǵdaıda AQSh-tyń Iranǵa qarsy jańa soqqylaryna qosylý múmkindigin qarastyryp jatyr.
Alaıda Izraıl bıligi bul aqparatqa qatysty ázirge resmı túsinikteme bergen joq.
Aıta keteıik, Iran AQSh-tyń Kýveıt pen Bahreındegi áskerı nysandaryna soqqy jasaǵanyn málimdedi.
