Izraıl Irandy Oman shyǵanaǵyndaǵy munaı tankerin zańsyz basyp aldy dep aıyptady

ASTANA. KAZINFORM — Izraıldiń Syrtqy ister mınıstri Gıdeon Saar Marshall araldary týymen júzgen jáne 30 myń tonna munaı-hımııalyq ónim tasymaldaǵan Talara tankerin zańsyz basyp alý isinde Irandy aıyptap otyr, dep jazdy Anadolý agenttigi.

X áleýmettik jelisindegi paraqshasynda jarııalanǵan habarlamasynda Gıdeon Saar Irannyń «júkti ruqsatsyz tasymaldaý» syltaýymen Oman shyǵanaǵynda kemeni basyp alý faktisin ashyq moıyndaǵanyn jazdy.

«Marshall araldary týymen júzip júrgen tankerdi basyp alýyn ashyq moıyndaǵan Iran óz qoldaýy bar Iemendegi hýsıtter sııaqty áreket etti», dep jazdy Izraıl mınıstri.

Mınıstrdiń aıtýynsha, Tegeran tek Taıaý Shyǵysqa ǵana emes, álemdik saýda men jahandyq beıbitshilikke de aıtarlyqtaı qaýip tóndiredi.

Saar Irandy «pıratızatsııalanǵan memleket» dep atap, ol halyqaralyq saýda joldaryn terrorızatsııalaıdy dep málimdedi jáne Iran Islam revolıýtsııasy gvardııasyn halyqaralyq deńgeıde terrorıstik uıym dep tanýǵa shaqyrdy.

1 qazanda Izraıl Qarýly kúshteri Taıaý Shyǵysqa gýmanıtarlyq kómek jetkizgen Global Sumud halyqaralyq flotılııasyn Jerorta teńiziniń halyqaralyq aýmaǵyna shabýyl jasap, kemedegi belsendilerdi zańsyz ustaǵan edi.

Eske sala keteıik, Indonezııada munaı tankerinde bolǵan órtten 10 adam qaza tapty. 

Onyń aldynda iri munaı tankerleri Ormýz buǵazyn aınalyp ótý úshin baǵytyn ózgertip jatqanyn jazǵanbyz.