Izraıl, Iran jáne Lıvanda qansha Qazaqstan azamaty esepte tur
ASTANA. KAZINFORM – Taıaý Shyǵystaǵy shıeleniske baılanysty Syrtqy ister mınıstrliginde, Izraıl, Iran jáne Lıvanda jedel jeliler iske qosyldy. Bul týraly vedomstvonyń resmı ókili Aıbek Smadııarov málim etti.
«Búginde Qazaqstannyń konsýldyǵy esebinde Izraılde 120 azamat, Iranda 102 azamat jáne Lıvanda 139 azamat tur. Onyń ishinde dıplomattar men olardyń otbasy músheleri de bar. Kóptegen azamattyń konsýldyq esepke turmaıtynyn aıta ketý kerek. Osy oraıda baılanys ornatý jáne Qazaqstan azamattarynyń tizimin daıyndaý biraz ýaqyt alady. Osy múmkindikti paıdalana otyryp Qazaqstan azamattaryn atalǵan elderde konsýldyq esepke turýdy shaqyramyz. Qazirgi ýaqytta Izraıl, Iran jáne Lıvanda turatyn Qazaqstan azamattarynan asa qajettilik bolmasa turyp jatqan jerlerinen shyqpaýǵa, qaýipsizdik sharalaryn barynsha kúsheıtip, saqtyq pen qyraǵylyq tanytýdy suraımyz», — dedi Aıbek Smadııarov.
Sondaı-aq, resmı ókil Taıaý Shyǵystaǵy Qazaqstan azamattary sol eldiń bıliginiń usynymdaryn oryndaý kerektigin aıtty.
«Odan bólek, atalǵan elderdegi Qazaqstannyń elshiligi ókilderimen baılanysta bolýdy suraımyz. Syrtqy ister mınıstrliginde, Izraıl, Iran jáne Lıvanda jedel jeliler iske qosyldy. Tolyq aqparat SІM-niń jáne elshilikterdiń resmı resýrstary men áleýmettik jelide jarııalanady», — deıdi ol.
Buǵan deıin Qazaqstannyń Izraıldegi Elshiligi Taıaý Shyǵystaǵy jaǵdaıǵa baılanysty úndeý jasaǵanyn jazǵan bolatynbyz.
Aıta keteıik, buǵan deıin Iran Izraıldi bombalady, qaptaǵan zymyran ushyrdy.
Artynsha, Ulybrıtanııa Irannyń Izraılge zymyrandyq shabýylyn aıyptady.
Sondaı-aq Iran men Aýǵanstan shekarasynda 10 shaqyrymdyq qabyrǵa turǵyzyldy.
Qazaqstannyń Azamattyq avıatsııa komıteti Taıaý Shyǵystaǵy kúrdeli ahýalǵa baılanysty málimdeme jasady.
