Izraıl Iran men Lıvanǵa soqqylardy jalǵastyratynyn málimdedi
ASTANA. KAZINFORM - Izraıl áskeri Iran men Lıvandaǵy nysandarǵa áli soqqy berip jatyr. Bul týraly Izraıl premer-mınıstri Bınıamın Netanıahý málimdedi. Al Tegeran óz kezeginde Izraılge zymyrandar ushyrdy. Buǵan deıin Donald Tramp Iran basshylyǵymen «ónimdi kelissózder» júrgizilgenin habarlaǵan bolatyn, dep habarlaıdy DW.
Izraıl Iran men Lıvandaǵy nysandarǵa soqqy jasap jatyr. Bul týraly Bınıamın Netanıahý 23 naýryz, dúısenbi kúni X áleýmettik jelisinde jarııalanǵan beıneúndeýinde aıtty.
— Biz Iranǵa da, Lıvanǵa da soqqy berip jatyrmyz. Irannyń zymyran jáne ıadrolyq baǵdarlamasyn álsiretip, «Hezbolla» uıymyna eleýli zııan keltire beremiz. Birneshe kún buryn taǵy eki ırandyq ıadrolyq ǵalymnyń kózin joıdyq, — dedi ol.
Sol málimdemede Izraıl premeri AQSh prezıdenti Donald Tramppen telefon arqyly sóıleskenin jetkizdi.
Onyń aıtýynsha, amerıkalyq kóshbasshy Izraıl men AQSh áskerleriniń «eleýli jetistikterin» memleketterdiń «ómirlik mańyzdy múddelerin» qorǵaıtyn kelisim aıasynda áskerı maqsattarǵa jetý úshin paıdalanýǵa úmit bildirgen.
Tramp Iranmen kelissózder týraly aıtty
Óz kezeginde Donald Tramp buǵan deıin Iranmen nátıjeli kelissózder júrgizilgenin jáne Taıaý Shyǵystaǵy qaıshylyqtardy «shartsyz retteý» múmkin ekenin málimdegen. Osyǵan baılanysty ol Irannyń elektr stantsııalary men energetıkalyq ınfraqurylymyna soqqy berýdi bes kúnge keıinge qaldyrýdy tapsyrǵanyn jazdy Truth Social jelisinde.
Alaıda Iran bıligi bul málimdemelerdi joqqa shyǵardy. Vashıngtonmen eshqandaı kelissóz bolmaǵanyn jáne júrgizilipjatpaǵanyn Irannyń Tasnim memlekettik aqparat agenttigi joǵary laýazymdy derekkózge silteme jasap habarlady.
Iran Izraılge zymyran ushyrdy
24 naýryzǵa qaraǵan túni Iran Izraıldiń soltústigine zymyrandarmen soqqy jasady. Bul týraly Izraıl qorǵanys armııasy habarlap, áýe shabýylyna qarsy qorǵanys kúshteri qaýiptiń betin qaıtarý úshin jumys istep jatqanyn málimdedi. Zardap shekkender týraly aqparat joq.
Sol málimdemede Izraıl premeri AQSh prezıdenti Donald Tramppen telefon arqyly sóıleskenin jetkizdi. Onyń aıtýynsha, amerıkalyq kóshbasshy Izraıl men AQSh áskerleriniń «eleýli jetistikterin» memleketterdiń «ómirlik mańyzdy múddelerin» qorǵaıtyn kelisim aıasynda áskerı maqsattarǵa jetý úshin paıdalanýǵa úmit bildirgen.
Osyǵan deıin Irannyń batysynda AQSh pen Izraıl shabýylynan 6 adam qaza taýyp, 43 adam jaralanǵany týraly jazdyq.