Izraıl indet juqtyrǵandar kóbeıýine baılanysty jappaı karantın engizip jatyr
IERÝSALIM. QazAqparat – Izraıl úkimeti koronavırýsqa baılanysty engizilgen karantın sharalaryn qatańdatý sheshimin qabyldady. Eldiń premer-mınıstri Bınıamın Netanıahý ınfektsııanyń jańa tolqyny Izraıldi «orǵa» ıtermelep jatqanyna qatysty alańdaýshylyq bildirdi, dep habarlaıdy QazAqparat Reuters agenttigine silteme jasap.
Bir apta buryn, 18 qyrkúıekte Izraıl karantın sharalaryn qaıta engizgen. Apta ishinde 9 mıllıon halqy bar elde koronavırýs juqtyrýdyń 7 myń oqıǵasy tirkeldi.
Erteń, 25 qyrkúıek kúni elde engiziletin jappaı karantın jaǵdaıynda tek azdaǵan kásiporyndarǵa jumys isteýge ruqsat etilgen – bul qarjy ınstıtýttary, densaýlyq saqtaý uıymdary, azyq-túlik dúkenderi, kólikke janarmaı quıý stansalary, sondaı-aq aýylsharýashylyq kásiporyndary.
Sondaı-aq, saparǵa shyǵýǵa qosymsha shekteýler engiziledi – endi úıden tek azyq-túlik pen dári-dármek satyp alý úshin, sondaı-aq keńesege deıin jetý úshin ǵana shyǵýǵa bolady. Izraıldegi mektepter áli jabyq.
Atap óteıik, Izraıl úkimeti jappaı karantındi taǵy eki aptaǵa engizý máselesin birneshe saǵat boıy talqylaǵan.
«Sońǵy eki kún biz sarapshylardan bul kúrdeli sheshimdi shuǵyl túrde qabyldamasaq, ordyń shetinde qalyp qoıatynymyzdy estidik», - dep málimdedi B.Netanıahý mınıstrler kabınetine arnaǵan sózinde.
Izraıldiń densaýlyq saqtaý mınıstrligi sońǵy táýlikte elde koronavırýs juqtyrý oqıǵalarynyń sany 6 667-ge jetip, buryn engizilgen karantınge qaramastan, 200 myń oqıǵa kórsetkishinen asqanyn málim etti. Izraılde karantın birinshi ret naýryz aıynda engizilip, mamyrǵa deıin sozylǵan.
