Izraıl Ierýsalımdegi oqıǵalardy kórsetken 5 medıa-platformaǵa tyıym saldy

ASTANA. KAZINFORM — Izraıl Ierýsalım men «Al-Aksa» meshitindegi oqıǵalardy jarııalaıtyn bes palestınalyq medıa-platformaǵa qyzmetine tyıym salǵany belgili boldy, dep habarlaıdy Anadoly.

Izraıl Qorǵanys mınıstrliginiń sheshimi boıynsha arab tilindegi aqparattyq jeliler: «Al-Asıma al-Ihbarııa», «Mıradj», «Ierýsalım Kompasy», «Ierýsalım alańy» jáne «Ierýsalım Plıýs» jabyldy. Tyıym salynǵan medıa-resýrstardyń shtab-páteri Ierýsalımde ornalaspaǵan.

Izraıldiń Channel 12 telearnasynyń habarlaýynsha, Shın-Bet (ShABAK) ishki qaýipsizdik qyzmeti júz myńdaǵan jazylýshysy bar bul medıa-platformalardy «terrorıstik uıymdar tizimine» engizýdi suraǵan.

Qorǵanys mınıstri Israel Kats atalmysh platformalardy terrorıstik uıymdar tizimine engizý týraly sheshimge qol qoıyp, Bas prokýror bul áreketke zańdyq kedergi joq ekenin rastaǵan.

Málimetterge qaraǵanda, Ierýsalımdegi oqıǵalardy jarııalaıtyn platformalar «HAMAS uıymynyń bir bólimshesi retinde áreket etedi» dep kórsetilgen. Tyıym salýdyń negizi retinde «Ierýsalım men Al-Aksa meshitindegi oqıǵalar týraly provokatsııalyq jarııalanymdar» aıyptalǵan.

Sheshimniń maqsaty — Ierýsalım men «Al-Aksany» oqshaýlaý

«Al-Asıma al-Ihbarııa» platformasy Izraıl sheshimine narazylyq bildirdi.

— Okkýpatsııalyq Izraıl Ierýsalımdegi medıa-platformalardy jaýyp, qysym kórsetý men basyp-janshý tarıhyna jańa paraqty qosty. Bul sheshim arqyly Izraıl Ierýsalım men Al-Aksany oqshaýlap, olardy maqsat etip kórsetip, bolyp jatqan oqıǵalardy álemnen jasyrýǵa tyrysady, — delingen platformanyń habarlamasynda.

Sonymen qatar, «Al-Asıma al-Ihbarııa» — Ierýsalım jergilikti qaýymdastyǵynyń kúsh-jigerimen qurylǵan táýelsiz medıa-platforma, ol halyqaralyq qoǵamǵa Ierýsalım men «Al-Aksa» meshitinde bolyp jatqan buzýshylyqtar týraly aqparat jetkizýge umtylady.

Budan buryn 14 el jáne halyqaralyq uıymdar Izraıldegi AQSh elshisiniń málimdemesin aıyptaǵanyn jazǵan bolatynbyz.