Izraıl Hezbollanyń Lıvannyń ońtústigindegi nysandarǵa soqqy jasaǵanyn habarlady

ASTANA. KAZINFORM – Lıvannyń ońtústigindegi shekaradaǵy jaǵdaı qaıtadan ýshyqty, dep habarlaıdy Kazinform menshikti tilshisi.

Izraıl armııasy seısenbi kúni Lıvannyń ońtústigindegi birneshe aımaqta «Hezbolla» nysandaryna birqatar shabýyl jasaǵanyn málimdedi. 

Izraıl qorǵanys kúshteriniń (TsAHAL) málimetinshe, nysanalardyń qatarynda «Hezbollanyń» áskerı qanaty – «Radvan» kúshteri paıdalanatyn jattyǵý kesheni, sondaı-aq birneshe qurylymdar men ushyrý alańy boldy. 

TsAHAL bul ınfraqurylym Izraılge qarsy shabýyldardy daıyndaý jáne ilgeriletý úshin paıdalanylǵanyn jáne qol jetkizilgen kelisimderdi buzý dep qarastyrylǵanyn atap ótti.

- Nysanalarǵa soqqy jasaý jáne Izraıl memleketine qarsy áskerı áreketterge daıyndyq – Izraıl men Lıvan arasyndaǵy kelisimderdi buzý jáne Izraıl memleketine qaýip tóndirý, - dep málimdedi TsAHAL. 

Bul shabýyldar Izraıl men Lıvan atysty toqtatýdy baqylaıtyn áskerı komıtetke azamattyq ókilderin jibergennen keıin bir aptadan az ýaqyt ótken soń jasaldy. Bul qadam AQSh prezıdenti Donald Tramptyń Taıaý Shyǵys bastamasyna sáıkes kelissózdi keńeıtýge baǵyttalǵan qadam retinde qarastyrylyp otyr. 

Lıvannyń NNA aqparat agenttigi Izraıl ushaqtary eldiń ońtústigindegi birneshe aımaqqa birqatar áýe shabýyldaryn jasaǵanyn habarlady.

Buǵan deıin Izraıl Lıvannyń ońtústigindegi «Hezbolla» qarý-jaraq qoımalaryna shabýyl jasaǵanyn jazǵan bolatynbyz.