Izraıl Hameneıdi jyldar boıy ańdyp, onyń eki býnkeri baryn bilgen
ASTANA. KAZINFORM — Izraıldiń barlaý organdary buzylǵan kóshe kameralary, aqparat berýshiler men uıaly baılanys jelilerin paıdalanyp, Irannyń joǵary laýazymdy tulǵalarynyń júris-turysyn jyldar boıy baqylap kelgen, dep habarlaıdy Financial Times.
Izraıl Tegerannyń qaýipsizdik kameralaryna únemi qol jetkizip, Hameneımen birge júretin oqqaǵarlardy, júrgizýshilerdi jáne joǵary laýazymdy sheneýnikterdi baqylap otyrdy.
Aqpannyń 28-i kúni tańerteń Iran kóshbasshysynyń rezıdentsııasyna shabýyl jasamas buryn barlaý qyzmeti Iran basshylyǵy múshelerin baqylaǵan. Qupııa faıldar joǵary laýazymdy sheneýnikterdiń marshrýttaryn, kestelerin jáne qaýipsizdik málimetterin tirkedi. Izraıl men AQSh barlaý agenttikteri Aıatolla Hameneıdi keńsesinde qashan bolatynyn bilgen.
Jarylysqa deıin Iranǵa eskertý berilmeýi úshin rezıdentsııanyń janynda uıaly baılanys ýaqytsha isten shyqqan. Qońyraý shalýshylarǵa telefon jelileriniń bos emestigi týraly habarlamalar kelip túsken.
— Bombalar qulaǵanǵa deıin biz Tegerandy Ierýsalımdi biletinimizdeı jaqsy bildik, — dedi Izraıl barlaý ofıtseri.
Ol ulttyq barlaý qyzmeti Mossad nysanalardy taldaý jáne operatsııalardy josparlaý úshin kamera derekterin, mobıldi jeliler men aqparat berýshilerdi paıdalanǵanyn atap ótti.
AQSh prezıdenti Donald Tramp soqqynyń Iran basshylyǵy tańǵy as iship otyrǵan kezde jasalǵanyn aıtty. Ol Hameneı ádette óziniń eki býnkeriniń birinde turatynyn jáne eger ol sonda bolǵan bolsa, ony joıý óte qıyn bolatynyn atap ótti.
Eske salaıyq, 1 naýryz kúni Iran resmı túrde Aıatolla Hameneıdiń qazasyn rastap, elde 40 kúndik ulttyq aza tutý jarııalanǵan bolatyn.
Iranda joǵary basshy qaza bolǵannan keıin bılikti tapsyrý rásimi bastaldy.
Aıatolla Álıreza Arafı Irandy basqarýshy keńes quramyna kirip, Islam Respýblıkasynyń jańa joǵary jetekshisin saılaý aralyǵynda eldi ýaqytsha basqarýǵa kiristi. 67 jastaǵy Arafı yqpaldy shııttik dinı qaıratker retinde tanylyp, jaqynda qaıtys bolǵan Aıatolla Álı Hameneıdiń senimdi adamy bolǵan.
AQSh prezıdenti Donald Tramp Iranǵa qarsy áskerı operatsııa qoıylǵan mindetter tolyq oryndalǵanǵa deıin jalǵasatynyn habarlady.