Izraıl HAMAS tutqyndaryn bosatý boıynsha jańa usynys ázirledi
ASTANA. KAZINFORM – Jańartylǵan usynysta birinshi kezeńge – tutqyndardy bosatýǵa basa nazar aýdarylady. Sondaı-aq, HAMAS kelisimniń bir bóligin júzege asyrýǵa ashyq ekenin kórsetti, dep habarlaıdy Kazinform agenttiginiń arnaıy tilshisi Axios basylymyna silteme jasap.
Amerıkalyq basylym Izraıldiń eki sheneýnigine silteme jasap, jańartylǵan usynystyń tamyz aıynda talqylanǵan, biraq júzege aspaǵan usynystan asa kóp ózgermegenin, alaıda qazir ol birinshi kezeńdi oryndaýǵa erekshe baǵyttalǵanyn atap ótti.
Resmı tulǵalardyń aıtýynsha, HAMAS ıkem tanytyp, kelisimdi tipti ishinara júzege asyrýǵa daıyn ekenin bildirgen.
Endi Izraıl 60 kúnge deıin uzaratyn atysty toqtatý nusqasyn qarastyrýǵa daıyn, buǵan deıin birinshi kezeń 42 kúnmen shektelgen edi. Atysty toqtatý rejımi kezinde tiri qalǵan barlyq tutqyndar (áıelder, 50 jastan asqan erler jáne aýyr syrqaty barlar) bosatylady. Izraıl osy sanattaǵy 33 tutqyndy bosatýdy talap etýde, biraq olardyń sanynyń aıtarlyqtaı azaıǵanyn túsinedi.
Izraıl burynǵydaı júzdegen palestınalyq tutqyndy, onyń ishinde ólimge alyp kelgen teraktiler úshin ómir boıyna sottalǵan keıbir tutqyndardy bosatýǵa daıyn.
Axios habarlaǵandaı, Izraıl premer-mınıstri Bınıamın Netanıahý, birneshe joǵary laýazymdy mınıstrler jáne arnaıy qyzmet basshylary bul usynysty jeksenbi kúni maquldaǵan. Keıin ol Mysyr ókilderine tapsyrylyp, dúısenbi men seısenbi kúnderi Kaırde HAMAS múshelerine tanystyrylǵan.
Qazirgi ýaqytta Mysyr HAMAS-pen kelissózder júrgizýdiń negizgi arnasyna aınaldy. Degenmen, Qatar ara aǵaıyn retindegi rólinen bas tartqannan keıin de kelissózderge qatysýyn jalǵastyrýda.
Bul ýaqytta Donald Tramptyń Taıaý Shyǵys boıynsha keńesshisi bolyp taǵaıyndalǵan Massad Býlos Le Point frantsýz basylymyna «eki tarap kelisimniń jalpy sheńberin maquldaǵanyn» habarlady.
— Soǵys is júzinde aıaqtaldy, — deıdi ol. — Aıtarlyqtaı áskerı is-qımyldar júrgizilip jatqan joq. Endigi jalǵyz másele — tutqyndar, eki tarap birneshe ret kepildegi adamdar men palestınalyq tutqyndardy aıyrbastaý týraly ýaǵdalasqan bolatyn. Kelisimniń negizgi erejeleri anyqtaldy, tek birneshe esimderge, palestınalyq taraptan bosatylatyn adamdar sanyna jáne almasý júrgiziletin kezeńge qatysty usaq-túıek máselelerdi retteý qaldy, — dep túsindirdi Býlos.
Qazirgi ýaqytta Izraıl mysyrlyq deldaldar arqyly HAMAS tarapynan jaýap kútip otyr. Eger HAMAS oń jaýap berse, Izraıl delegatsııasy Kaırge baryp, atysty toqtatý kúnderiniń sany, bosatylatyn tutqyndardyń sany jáne árbir tutqynǵa aıyrbastalatyn palestınalyq tutqyndar sany sııaqty máselelerdi túpkilikti kelisýge tyrysady.
Sonymen qatar, Izraıl armııasy Gaza sektoryna shabýyldaryn jalǵastyrýda. Sársenbi kúni ızraıldik kúshter Gaza sektoryndaǵy «ál-Mavası qaýipsiz aımaǵyna» soqqy berip, keminde 21 adam qaza taýyp, ondaǵan adam jaraqat aldy. AlJazeera habarlaýynsha, ál-Mavası aımaǵyndaǵy shatyrly lagerge soqqy kezinde balalar men áıelder tirideı janyp ketken.
Izraıl basshysy Netanıahý kepilge alynǵandardy qaıtarǵandarǵa aqsha ýáde etti.
Buǵan deıin Izraıldiń Halyqaralyq qylmystyq sot sheshimine qarsy shaǵym túsirgenin habarlaǵan edik.
Izraıl mınıstri evreılerdi Gazaǵa qonystandyrýǵa shaqyrdy.
Ótken aptada Izraıl Gaza sektoryn bombalaýdy kúsheıtip, soqqylardan 42 adam qaza tapty.