Izraıl HAMAS-tyń tutqyndardy bosatýdy toqtatý týraly málimdemesine jaýap berdi

ASTANA.KAZINFORM - Izraıl qorǵanys mınıstri Israel Kats HAMAS málimdemesine qatysty pikir bildirdi, dep jazady BBC.

— HAMAS-tyń kepilge alynǵandardy bosatýdy toqtatý týraly málimdemesi atysty toqtatý kelisimin tolyǵymen buzý. Men Izraıl armııasyna Gazadaǵy kez kelgen oqıǵaǵa qarsy jaýyngerlik ázirligin arttyrýdy jáne Izraıl eldi-mekenderin qorǵaýdy qamtamasyz etýdi tapsyrdym, - dedi Israel Kats HAMAS málimdemesine jaýap bere otyryp.

Óz kezeginde AQSh prezıdenti Donald Tramp bul toptan senbige deıin barlyq kepilge alynǵandardy bosatýdy talap etti, áıtpegende Gaza sektoryndaǵy atysty toqtatý kelisimi buzylady – «tozaq oty qaıta tutanady». Bul týraly ol dúısenbi kúni Aq úıde jýrnalıstermen bolǵan suhbatynda aıtty, dep habarlaıdy TASS.

Aıta keteıik, senbi kúngi Gaza sektoryndaǵy atysty toqtatý kelisiminde kózdelgendeı, sodyrlar tutqynynda bolǵan ızraıldik kepilge alynǵandardy bosatýdyń jáne olardy palestınalyq tutqyndarǵa aıyrbastaýdyń kelesi kezeńi ótýi tıis bolatyn. HAMAS senbige josparlanǵan ızraıldik kepildegilerdi bosatýdy belgisiz ýaqytqa keıinge shegeretinin málimdedi.

Eske salsaq HAMAS taǵy úsh ızraıldik tutqyndy bosatqan bolatyn.