Izraıl HAMAS-tyń Eýropada lańkestik áreket uıymdastyrǵysy kelgenin málimdedi

Izraıl arnaıy qyzmeti túrli elderdegi áriptesterimen birge álem boıynsha lańkestik áreket uıymdastyrýǵa daıyndyqpen aınalysqan HAMAS jelisi bar ekenin anyqtady. Kazinform bul týraly dw.com basylymyna silteme jasap habarlaıdy. 

Izraıl bıligi 13 qańtarda HAMAS radıkal ıslamshyl qozǵalysy sarbazdary Eýropa, Afrıka men Taıaý Shyǵystaǵy birqatar nysanǵa shabýyl jasporlaǵanyn málimdedi.

- Jalǵasyp jatqan barlaý amaldary arqasynda HAMAS lańkestik uıymy álemdegi jazyqsyz adamdarǵa shabýyl jasaý maqsatynda kúsh-kórsetý aýqymyn shetelde keńeıtýge tyrysqanyn anyqtaıtyn kólemdi aqparat tabyldy, - delingen Izraıl premer-mınıstri Bınıamın Netanıahý keńsesiniń habarlamasynda.

Sondaı-aq habarlamada Izraıl ózidiginen jáne sheteldik arnaıy qyzmet ókilderimen birlese jumys isteı otyryp oǵan dálel tapqany jazylǵan. 

HAMAS-tyń osy josparyna baılanysty 2023 jylǵy 14 jeltoqsanda Danııa men Germanııanyń quqyq qorǵaý organdary Eýropadaǵy kúdiktilerdi jappaı tutqyndaǵanyn málim etti. Qazir olarǵa qatysty tergeý amaldary júrip jatyr. 

Izraıl úkimetiniń málimdemesi boıynsha, «shetelde» Lıvandaǵy komandırlerden bastap jergilikti jerlerdegi oryndaýshylardy qosqanda «HAMAS-tyń óte aýqymdy lańkestik qyzmeti» anyqtalǵan. Premer kabıneti HAMAS-tyń naqty maqsattarynyń biri Shvetsııadaǵy Izraıl elshiligi bolǵanyn aıtty.

Sonymen qatar HAMAS pılotsyz ushý apparattaryn satyp alyp, Eýropada uıymdasqan qylmystyq top múshelerin jınamaq bolǵany da málimdemede baıandalǵan.