Izraıl HAMAS-ty tolyǵymen joıý josparyn jarııalady
ASTANA.KAZINFORM — Izraıl úkimetiniń basshysy Gaza sektoryndaǵy jańa áskerı áreketti jaqtady, dep habarlaıdy Kazinform tilshisi.
Izraıl premer-mınıstri Bınıamın Netanıahý armııanyń Gaza qalasyn ǵana emes, ortalyq lagerler men ál-Mavası aımaǵyndaǵy HAMAS bekinisterin de baqylaýǵa alý josparyn jarııalap, operatsııanyń maqsaty HAMAS-ty tolyq talqandaý ekenin basa aıtty.
Bul týraly ol jeksenbi kúni Ierýsalımde ótken baspasóz máslıhatynda málimdedi.
— Izraıldiń jumysty aıaqtap, HAMAS-ty jeńýden basqa amaly joq, — dedi Netanıahý.
Izraıl premer-mınıstri bul sheshimniń áskerı kabınet otyrysynda HAMAS-tyń atysty toqtatý jáne kepilge alynǵandardy bosatý jónindegi kelissózderdegi «ymyraǵa kelýden bas tartýyna» baılanysty qabyldanǵanyn aıtty. Netanıahý bul aımaqtardy bógeý jeńiske jáne tutqyndardyń qaıtarylýyna ákelmeıtinin, sondyqtan shabýyl jasaý týraly sheshim qabyldanǵanyn atap ótti.
Izraıl premer-mınıstri ádeıi gýmanıtarlyq daǵdarys týdyrdy degen aıyptaýlardy joqqa shyǵaryp, qaqtyǵys bastalǵannan beri anklavqa 2 mıllıon tonnaǵa jýyq kómek jiberilgenin aıtty. Ol HAMAS-ty kerek-jaraqtardy tartyp aldy jáne olardyń taralýyna kedergi jasady dep aıyptady. Onyń aıtýynsha, Izraıl «qaýipsiz dálizder» jelisin keńeıtip, kómek taratý pýnktteriniń sanyn kóbeıtýdi, sondaı-aq jaǵdaıdy kórsetý úshin sheteldik jýrnalısterdi tartýdy kózdep otyr.
— Bizdiń maqsatymyz Gazany basyp alý emes, ony «terrorshylardan» azat etý, — dedi ol.
Baspasóz máslıhaty barysynda Netanıahý «HAMAS-tan keıingi kúndi» anyqtaýy kerek dep sanaıtyn bes prıntsıpti atap ótti: topty qarýsyzdandyrý, barlyq kepilge alynǵandardy bosatý, Gaza sektoryn demılıtarızatsııalaý, qaýipsizdikke Izraıldiń baqylaýyn ornatý jáne beıbit, ızraıldik emes azamattyq ákimshilik qurý.
Osy arada gýmanıtarlyq kómek almaq bolǵan ondaǵan palestınalyqtardyń qaza tapqany habarlandy. Aýrýhanalar men kýágerlerdiń aıtýynsha, shabýyldar Morag, Netzarım, Zıkım jáne Teına aýdandarynda bolǵan. Izraıl armııasy Gaza sektorynyń ortalyǵyndaǵy kómek kórsetý ortalyqtarynyń mańynda oq atpaǵanyn málimdedi.
HAMAS Netanıahýdyń baspasóz máslıhatyna dereý jaýap berip, onyń málimdemelerin «kezekti ótirikter serııasy» dep atady.
— Netanıahý ótirik aıtýdy, aldaýdy jáne jurtshylyqty adastyrý ádetinen tanbaı otyr. Baspasóz máslıhatynda aıtqandarynyń bári ótirik jáne ol shyndyqqa bet bura almaıdy, kerisinshe, ol ony burmalaıdy jáne jasyrady, — dedi HAMAS saıası bıýrosy basshysynyń medıa keńesshisi Taher ál-Nýný Frans Press agenttigine.
Buǵan deıin Izraıl mınıstrler kabıneti Gaza qalasyn basyp alý josparyn bekitken bolatyn.