Izraıl HAMAS-pen jartylaı bitimge kelýge kelispeıtinin málimdedi
ASTANA. KAZINFORM – Izraıl úkimetiniń ókili Davıd Menser el HAMAS qolyndaǵy barlyq tutqyndardyń tolyq bosatylýyn talap etetinin málimdedi, dep jazady VVS.

Palestınalyq top Qatar men Egıpet usynǵan, 60 kúndik atysty toqtatý jáne tutqyndardyń jartysyn bosatý jónindegi jańa usynysty qabyldaǵan edi. Qatarlyq dıplomattardyń aıtýynsha, ol buǵan deıin AQSh-tyń aralasýymen daıyndalǵan qujatqa uqsas deýge de bolady.
AQSh prezıdentiniń ókili Stıv Ýıtkoff maýsym aıynda 60 kúnge atysty toqtatý josparyn usynǵan bolatyn. Josparǵa sáıkes, alǵashqy jáne jetinshi kúni 10 tutqyn bosatylyp, 18 adamnyń denesi qaıtarylýy tıis edi. Buǵan jaýap retinde Izraıl 125 ómir boıyna sottalǵan palestınalyqty, Gaza sektorynda ustalǵan 1111 adamdy jáne 180 marqumnyń máıitin tapsyrýǵa kelisken.
Sol kezde Izraıl usynysty qabyldap, HAMAS bas tartqan edi. Sebebi qujatta ýaqytsha bitimniń turaqty beıbitshilikke ulasatynyna kepildik bolmaǵan.
Jańa usynysty Izraıl resmı túrde keri qaıtarmaǵanymen, Davıd Menserdiń aıtýynsha, úkimet endi «jartylaı mámilelerge» múddeli emes.
Aıta keteıik, Izraılde Gazany okkýpatsııalaý josparyna qarsy jappaı narazylyq ótti.