Izraıl — HAMAS: bitimgershilik kelisim jasalmaıdy
Izraıl Gaza sektoryndaǵy qurlyq jáne áýe shabýylyn keńeıtip jatyr. Beısenbi kúni búkil anklavtyń túrli aýdanynda eldi mekender bombalandy. Kazinform bul týraly Euronews-ke silteme jasap habarlaıdy.
Ońtústiktegi Rafah qalasyndaǵy turǵyn úıge jasalǵan zymyran soqqysynan 23 adam qaza tapty. Jaraqat alǵan adamdar jergilikti aýrýhanaǵa jetkizilip jatyr.
Sodyrlar baqylaıtyn Gaza Densaýlyq saqtaý mınıstrliginiń málimetinshe, 7 qazannan bergi shaıqastarda 21 myńnan astam palestınalyq qaza tapty jáne turǵyndardyń 85%-y úılerin tastap ketýge májbúr bolǵan.
Izraıl armııasy Gazadaǵy áskerı operatsııany HAMAS lańkesteri Izraılge shabýyl jasap, 1 200 adamdy (olardyń kópshiligi beıbit turǵyndar) óltirgennen keıin bastady.
Qurbandar sany búginge deıin 500-ge jetken. Olardyń arasynda ofıtser, sarbaz jáne zapastaǵy sarbazdar bolǵan. 167 adam 27 qazanda bastalǵan qurlyq shabýyly kezinde qaza tapty.
«Gaza sektoryndaǵy halqymyzǵa qarsy agressııany tolyǵymen jáne túpkilikti toqtatý týraly kez kelgen ıdeıalar men usynystarǵa ashyq ekenimizdi rastaımyz. Halqymyz agressııanyń ýaqytsha emes, tolyqtaı toqtatylǵanyn qalaıdy», - dedi HAMAS ókili Ýsama Hamdan.
Osy arada júzdegen jas azamat jeksenbi kúni bastalǵan Tel-Avıvten Ierýsalımge sherýin jalǵastyrýda. Sherýge qatysýshylar bılikten kepilge alynǵandardy bosatý úshin barlyq qajetti sharany qabyldaýdy talap etedi: lańkester 100-den astam adamdy tutqynda ustap otyr.
Izraıl áskerıleri qaqtyǵys kezinde qatelesip, kepilge alynǵan úsh adamdy óltirgen. Osy oqıǵaǵa qatysty tergeý amaldary aıaqtaldy. Izraıl armııasy atalǵan adamdardyń ólimi úshin jaýapkershilikti óz moınyna aldy.
«Bolǵan oqıǵa úshin jaýapkershilikti óz moınymyzǵa alamyz. Marqum bolǵandardyń otbasylaryn tergeý qorytyndylarynan habardar ettik. Bul óte aýyr bolsa da ashyq áreket etýdemiz», - dedi Izraıl qorǵanys kúshteriniń ókili Danıel Hagarı.
Beısenbi kúni gýmanıtarlyq kómek, sonyń ishinde sektor turǵyndaryna arnalǵan janar-jaǵarmaı tıelgen júk kólikteriniń kolonnalary Rafah baqylaý-ótkizý pýnkti arqyly Mysyrdan Gazaǵa ótti. Izraıl júkterdiń ótýine ruqsat berýge kelisip otyr. Biraq halyqaralyq qaýymdastyqtyń atysty toqtatý týraly úndeýine qaramastan, bul lańkesterdiń jeńisi bolatynyn aıtqan Izraıl HAMAS-pen bitimge kelýden bas tartyp otyr.
