Izraıl generaldy óltirgeni úshin kek alǵan jaǵdaıda Irannyń ıadrolyq nysandaryna soqqy berýge daıyn

ASTANA. KAZINFORM – Tegeran Damaskide general Mohammad Reza Zahedıdi óltirgeni úshin kek alýǵa sheshim qabyldasa, Izraıl Irannyń ıadrolyq nysandaryna soqqy berý arqyly jaýap qaıtarýǵa daıyn. Bul týraly brıtandyq The Sun basylymy batystyq qaýipsizdik agenttikterindegi derekkózderge silteme jasap habarlady, dep jazdy TASS aqparat agenttigi. 

Basylymnyń atap ótýinshe, Izraıldiń mundaı áreketteri búkil Taıaý Shyǵys úshin boljaýǵa bolmaıtyn saldarǵa ákelýi múmkin.

1 sáýirde SANA agenttigi Izraıl áýe kúshteri Damask qalasyndaǵy úıge soqqy jasaǵanyn habarlady. Iran BAQ eldiń Sırııa astanasyndaǵy konsýldyq ǵımaraty atqylanǵanyn málimdedi. Islam revolıýtsııasy Saqshylar korpýsynyń qoǵammen baılanys bólimi jeti áskerı keńesshi: generaldar Mohammad Reza Zahedı men Mohammad Hadı Hadjı Rahımıdiń jáne taǵy bes ofıtserdiń qaza tapqanyn jarııa etti. 

Irannyń IRIB memlekettik telearnasynyń habarlaýynsha, Zahedı Lıvan men Sırııadaǵy IRSK-nyń «Ál Kýds» kúshteriniń bólimshelerin basqarǵan.

Irannyń rýhanı jetekshisi aıatolla Álı Hameneıdiń málimdeýinshe, Tegeran Izraıldi soqqy jasaǵany úshin ókinetinin, al prezıdent Ebrahım Raısı shabýyl jaýapsyz qalmaıdy dep ýáde berdi.