Izraıl Gazanyń soltústigine shabýyl jasaýǵa daıyndalyp jatyr

ASTANA.KAZINFORM - Jeksenbi kúni AQSh prezıdenti Izraıl men HAMAS-ty Gaza sektorynda atysty toqtatý týraly kelisimge kelýge shaqyrdy, dep habarlaıdy Euronews.

AQSh prezıdenti Donald Tramp Gazadaǵy qaqtyǵysty tez arada sheshýge shaqyryp, anklavtaǵy 20 aıdan beri jalǵasyp kele jatqan qaqtyǵystardy toqtatý týraly kelisimge kelýdi talap etti. 12 kúnge sozylǵan Iran-Izraıl soǵysy bitimmen aıaqtalǵannan keıin Izraıldiń HAMAS-pen kelissózderi belsendi kezeńge ótkeni belgili.

AP Izraıl sheneýnigine silteme jasap, Izraıl premer-mınıstri Bınıamın Netanıahý aldaǵy aptalarda Vashıngtonǵa baratynyn jazdy. Al jaqyn kúnderi strategııalyq josparlaý jónindegi hatshy Ron Dermer atysty toqtatýdy talqylaý úshin ol jaqqa kelýdi josparlap otyr.

AQSh prezıdenti Gaza sektorynda bitimge kelýge shaqyrýdan birneshe saǵat buryn Izraıl oǵan soqqy berip, kem degende 60 adamnyń ómirin qıdy, dep habarlady Palestınanyń medıtsınalyq mekemeleri.

Atys juma kúni keshke bastalyp, senbi kúni tańerteńge deıin jalǵasty. Máıitter jetkizilgen Ál-Shıfa aýrýhanasy qyzmetkerleriniń aıtýynsha, 12 adam qonys aýdarǵandar ornalasqan Gaza qalasyndaǵy Palestına stadıonynyń janynda, al segiz adam páterlerde qaza tapqan.

Medıtsına qyzmetkerleriniń aıtýynsha, 20-dan astam máıit Naser aýrýhanasyna jetkizildi.

Senbi kúni tús aýa Gaza qalasynyń shyǵysyndaǵy kóshede bolǵan shabýylda 11 adam qaza taýyp, olardyń máıitteri Ál-Ahlı aýrýhanasyna jetkizildi.

- Gazada mámile jasańdar. Kepildegilerdi qaıtaryńdar,- dep jazdy Tramp jeksenbi kúni tańerteń áleýmettik jelide.

Eki kún buryn ol atysty toqtatýǵa kelesi aptada qol jetkizýge bolatynyn aıtty. Jýrnalısterdiń bul týraly suraǵanyna ol: «Biz Gaza máselesimen aınalysyp jatyrmyz jáne ony sheshýge tyrysamyz», - dedi.

Tramp Izraıl men HAMAS kelesi aptada bitimge keletinine ýáde etti.