Izraıl Gazaǵa shabýylyn qysqartady
ASTANA. KAZINFORM — HAMAS-tyń aman qalǵan kepilge alynǵandar men denelerin Izraılge tapsyrý týraly keliskenin málimdegennen keıin Izraıl Tramptyń Gaza josparynyń birinshi kezeńin «tez arada júzege asyrýǵa» daıyndalyp jatyr, dep habarlaıdy DW.
Bul týraly 4 qazan, senbige qaraǵan túni Izraıl premer-mınıstri Bınıamın Netanıahý keńsesi habarlady.
— Biz Aq úı basshysymen jáne «onyń komandasymen soǵysty Izraıl belgilegen jáne prezıdent Tramptyń kózqarasyna sáıkes keletin prıntsıpterge sáıkes aıaqtaý úshin tolyq yntymaqtastyqta jumys isteýdi jalǵastyramyz, — dep keltirdi málimdemeni AFP.
Izraıldiń saıası basshylyǵy áskerılerge anklavtaǵy shabýyl operatsııalaryn azaıtýdy tapsyrdy, dep habarlady Reuters agenttigi.
Palestınalyq HAMAS radıkaldyq ıslamdyq qozǵalysynyń Gaza sektoryndaǵy kepilge alynǵan adamdardy bosatýǵa jáne Amerıkanyń soǵysty toqtatý josparynyń basqa da birqatar sharttaryn oryndaýǵa daıyn ekeni týraly málimdemeleri aıasynda Amerıka kóshbasshysy Izraıldi Gazany bombalaýdy dereý toqtatýǵa shaqyrdy.
Sodyrlar qalǵan kepilge alynǵandar men máıitterdi Izraılge berýge kelisti.
Sodyrlar «almasý úshin qajetti jaǵdaı» jasalǵan kezde «prezıdent Tramp usynǵan almasý formýlasyna sáıkes» qalǵan barlyq kepilge alynǵandar men máıitterdi Izraılge berýge kelisti.
— Qozǵalys osy kelisimniń egjeı-tegjeıin talqylaý úshin deldaldar arqyly kelissózdi dereý bastaýǵa daıyn ekenin rastaıdy, — dedi HAMAS.
Bul top sonymen birge Gaza sektoryn basqarýdy «Palestınanyń ulttyq konsensýsyna jáne arab jáne ıslamdyq qoldaýǵa negizdelgen» táýelsiz organǵa berý týraly kelisimin jarııalady.
Sonymen birge qozǵalys josparda kórsetilgendeı qarýsyzdaný máselesin qozǵamady. HAMAS-tyń Qatardaǵy jetekshileri AQSh prezıdenti bastamasynyń keıbir sharttaryn ózgertýdi talap etip otyr
Donald Tramp HAMAS-qa 5 qazanǵa deıin ýaqyt berdi
Tramp HAMAS-qa onyń beıbitshilik bastamasymen kelisý úshin 5 qazanǵa deıin ýaqyt berdi.
29 qyrkúıekte usynylǵan 20 tarmaqtan turatyn josparda basqa nárselermen qatar Gaza sektoryndaǵy kepilge alynǵandardy bosatý jáne Izraıl áskerin Palestına aýmaǵynan birtindep shyǵarý qarastyrylǵan. Izraıl óz kezeginde ómir boıyna bas bostandyǵynan aıyrylǵan 250 palestınalyq tutqyndy bosatýy tıis. HAMAS qozǵalysy bılikten shettetilip, qarýyn tastaýy kerek. Sonymen qatar, AQSh josparǵa sáıkes arab jáne halyqaralyq seriktestermen birlesip «halyqaralyq turaqtandyrý kúshin» qurýǵa nıetti.
Osyǵan deıin Túrkııany qosa alǵanda segiz memleket Tramptyń Gazadaǵy shabýyldy toqtatý josparyn qoldaǵany týraly jazdyq.