Izraıl Gazaǵa aýqymdy shabýyldy bastady
ASTANA. KAZINFORM – Izraıl áskerleri HAMAS-ty talqandap, Gazada kepilde qalǵan adamdardy bosatý úshin aýqymdy shabýyldy bastaǵanan málimdedi, dep jazady BBC.
Izraıl Qorǵanys armııasynyń habarlaýynsha, «Gıdeon arbasy» atty operatsııa barysynda áskerge sektordaǵy barlyq strategııalyq aýdandarǵa ornyǵý týraly buıryq berildi.
HAMAS-tyń baqylaýyndaǵy densaýlyq saqtaý, azamattyq qorǵanys vedomstvolarynyń sheneýnikteri beısenbiden bastap, ızraıldikterdiń Gazaǵa jasaǵan shabýyldarynan 25-ke jýyq adam ólgenin habarlaǵan.
Izraıl eki aılyq tatýlasý kelisimi buzylǵan soń naýryz aıynda Gazany qorshaýǵa aldy. AQSh prezıdenti Donald Tramp juma kúni Gaza sektorynda kóptegen adamnyń ashyǵyp jatqanyn habarlady.
Áskerıler HAMAS-tan keletin qaýip joıylyp, kepildiktegi adamdardyń bári bosatylmaıynsha, operatsııany toqtatpaıtynyn málimdep otyr. Olar keıingi 24 saǵatta Gaza sektory boıynsha terrorıstik nysandarǵa 150-den astam soqqy bergenderin aıtty.
Izraıl kelissózderdi jandandyryp, atysty toqtatyp, blokadany alyp tastaý týraly halyqaralyq deńgeıde qysym kórsetilip jatqanyna qaramastan bombalaýdy jáne shekara mańynda brondy tehnıka sanyn arttyrǵan.
Operatsııanyń bastalýy beıbit retteýdiń eshqandaı nátıje bermegenin kórsetse kerek.
Times of Israel basylymynyń habarlaýynsha, «Gedeon arbasy» operatsııasy Izraıl Qorǵanys armııasyna Gaza aýmaǵyna ornyǵyp, beıbit turǵyndardy eldiń ońtústigine qonystandyryp, HAMAS-qa shabýyldap, gýmanıtarlyq kómektiń jetkizilýin baqylaýǵa alýǵa múmkindik beredi.
Izraıl premer-mınıstri Benıamın Netanıahý mamyr aıynyń basynda Izraıldiń Gazaǵa basyp kirip, aımaqty basyp alyp, ustap turý úshin kólemdi shabýyl daıyndap jatqanyn aıtqan bolatyn.
Izraıl úkimeti Tramptyń Taıaý Shyǵystaǵy sapary aıaqtalmaıynsha, operatsııany bastamaýǵa ýáde bergen edi. Prezıdent óńirden juma kúni ketti.
BUU adam quqyqtary jónindegi Joǵarǵy komıssary Folker Tıýrk Izraıldiń jaqyndaǵy jaǵdaıdy ýshyqtyrý áreketi halyqaralyq quqyqty buzý bolyp eseptelýi múmkin ekenin eskertti.
Osyǵan deıin Izraıl áskeri aldaǵy birneshe kúnde Gazaǵa «tolyq kúshpen» kiretini týraly habarlaǵanyn jazdyq.