Izraıl Gazadaǵy HAMAS nysandaryna soqqy jasaýdy jalǵastyryp otyr

ASTANA. KAZINFORM –  Izraıl áskerıleri seısenbige qaraǵan túni Gaza sektoryn atqylaýdy jalǵastyrdy. Bul týraly Izraıl qorǵanys kúshteri men Shın-Bet qaýipsizdik qyzmetiniń birlesken málimdemesinde aıtylǵan, dep habarlaıdy VVS.

- Saıası eshelonnyń sheshimine sáıkes, TsAHAL armııasy men Shın-Bet qazirgi ýaqytta Gaza sektoryndaǵy HAMAS lańkestik uıymyna tıesili lańkestik nysandarǵa jappaı soqqy jasap otyr, - delingen habarlamada.

Izraıl premer-mınıstri keńsesinen jasalǵan málimdemede Benıamın Netanıahý men Qorǵanys mınıstri Israel Kats áskerılerge HAMAS-qa qarsy «sheshýshi áreket etý» týraly buıryq bergeni atap ótilgen.

- Bul HAMAS-tyń kepilge alynǵandardy bosatýdan birneshe ret bas tartqannan keıin, sondaı-aq AQSh prezıdentiniń arnaıy ókili Stıv Ýıtkoff pen deldaldardan túsken barlyq usynysty qabyldamaýdan keıin boldy. Izraıl armııasy qazirgi ýaqytta saıası basshylyq belgilegen soǵys maqsattaryna qol jetkizýge, sonyń ishinde tiri jáne óli tutqyndarymyzdy bosatý úshin Gaza sektoryndaǵy HAMAS lańkestik uıymynyń nysandaryna shabýyl jasap otyr, – dep málimdedi Netanıahý keńsesi.

HAMAS-tyń joǵary laýazymdy sheneýniginiń Reuters agenttigine málimdeýinshe, Izraıl 19 qańtarda bastalǵan atysty toqtatý kelisimin birjaqty túrde toqtatyp jatyr.

HAMAS-tyń Gazadaǵy baqylaýyndaǵy Azamattyq qorǵanys agenttiginiń habarlaýynsha, Izraıl áýe kúshteriniń birneshe soqqysynan keminde 20 adam, onyń ishinde bes bala qaza taýyp, ondaǵan adam jaraqat aldy.

- Izraıldiń Gaza sektorynyń aýdandaryna jasaǵan birneshe soqqysy saldarynan qaza tapqandar sany 20-dan astam adamǵa jetti, 70-ke jýyq adam jaraqat aldy, - dep habarlady agenttik ókili Mahmýd Basal Frans AFP-ǵa.

Keıin Gazadaǵy dárigerler tilshilerge qaza tapqandar sany 60 adamnan asqanyn habarlady. Bul derekterdiń durystyǵyn ázirge rastaý múmkin emes.

Aq úıdiń baspasóz hatshysy Kerolaın Levıtt Fox News efırinde Izraıldiń AQSh ákimshiligine Gazadaǵy nysandarǵa soqqy berý týraly aldyn ala eskertý jasaǵanyn málimdedi.

- Prezıdent Tramp anyq aıtqandaı, HAMAS, hýsıtter, Iran, tek Izraıldi ǵana emes, Amerıka Qurama Shtattaryn da úreılendirgisi keletinderdiń bári sol úshin jaýapqa tartylady, - dedi ol.

Qatar, Mysyr jáne AQSh deldaldyq jasaǵan bitimgershilik kelisimniń birinshi kezeńi HAMAS Izraılge shabýyl jasaǵannan keıin bastalǵan Gaza sektoryndaǵy 15 aıdan astam shaıqastan soń 19 qańtarda kúshine endi.

Kelisimniń birinshi kezeńi 1 naýryzda aıaqtaldy. Osy ýaqytqa deıin bitimgershiliktiń ekinshi kezeńiniń sharttary kelisiletini shamalanǵan, biraq bul bolmady.

Ótken aptada Benıamın Netanıahý keńsesi Izraıl ókilderi Mysyrda el sheneýnikterimen kezdesip, kepilge alynǵandardy bosatý máselesin talqylap jatqanyn málimdedi, dep eske saldy AFP.

Izraıldiń Gazadaǵy shabýyldarynan qaza tapqandar sany 48 543-ke jetkenin jazǵan bolatynbyz.