Izraıl Gazadaǵy áskerı operatsııasyn keńeıtti

ASTANA. KAZINFORM — Izraıl qorǵanys mınıstri Israel Kats Gazadaǵy operatsııany keńeıtip, aýmaqtyń «úlken bóligin», sonyń ishinde Izraıl armııasy qurǵan «qaýipsizdik aımaqtaryn» alatynyn aıtty, dep habarlaıdy VVS.

Mınıstrdiń aıtýynsha, operatsııanyń keńeıýi «aımaqty lańkestik ınfraqurylymdardan tazartýǵa jáne olardy joıýǵa» baǵyttalǵan jáne palestınalyqtardy jappaı evakýatsııalaýdy talap etedi.

Izraıl áskerıleri ońtústiktegi Rafah jáne Han ıÝnıs qalalarynda turatyn Gaza turǵyndaryna evakýatsııa týraly eskertý jasap, olarǵa buryn gýmanıtarlyq aımaq dep jarııalanǵan ál-Mavasıdiń jaǵalaý aımaǵyna kóshýdi buıyrdy.

Kats evakýatsııanyń urys júrip jatqan aımaqtarda bolatynyn aıtyp, gazalyqtardy soǵysty toqtatýdyń jalǵyz joly retinde HAMAS-ty joıyp, ızraıldik kepilge alynǵandardy qaıtarýǵa shaqyrdy.

Kats málimdemesinde Izraıldiń naqty qandaı aýmaqty alýdy kózdep otyrǵany aıtylmaǵan.

Izraıl kúshteri Gazada býferlik aımaq qurdy, soǵysqa deıin anklav shekarasynda bolǵan aýmaqty keńeıtti jáne Gaza ortalyǵy arqyly ótetin Netsarım dálizine úlken qaýipsizdik aımaǵyn qosty.

Jergilikti aýrýhanalardyń habarlaýynsha, Gaza sektoryndaǵy túngi soqqylardan taǵy 15 adam qaza tapty.

Palestınalyq derekkózderdiń habarlaýynsha, qutqarýshylar Han ıÝnıstegi úıden 12 adamnyń, onyń ishinde balalar men áıelderdiń máıitin shyǵarǵan.

Izraıl 18 naýryzda Gazaǵa qaıtadan shabýyl jasap, HAMAS-ty AQSh-tyń atysty toqtatý kelisimin uzartý jáne Gazada ustalǵan 59 kepildi bosatý týraly jańa usynysyn qabyldamady dep aıyptady.

HAMAS óz kezeginde Izraıldi qańtarda jasalǵan bastapqy kelisimdi buzdy dep aıyptap otyr.

Osyǵan deıin Hamas deldaldardyń Gaza sektorynda atysty toqtatý týraly usynysyn qabyl alǵany habarlandy.