Izraıl Gazadaǵy áskerı qımyldardy kúsheıtti: ondaǵan adam qaza tapty

ASTANA. KAZINFORM – Sońǵy táýlikte Izraıldiń ortalyq jáne soltústik Gazadaǵy áskerı áreketterinen keminde 60 adam kóz jumdy. Bul týraly jergilikti densaýlyq saqtaý ókilderi málimdedi, dep habarlaıdy Euronews.

Izraıl qorǵanys armııasynyń dereginshe, Gaza qalasynan sektordyń ońtústigine shamamen 750 myń adam kóshirilgen. Áskerı vedomstvonyń habarlaýynsha, sońǵy táýlikte áýe kúshteri Gazadaǵy 120 nysanaǵa soqqy jasaǵan. Onyń ishinde HAMAS jasaqtary paıdalanǵan ǵımarattar men ózge de ınfraqurylym bar.

Associated Press agenttiginiń málimetinshe, senbi kúni tańerteń Gaza qalasynyń Týfah aýdanynda áýe shabýylynyń saldarynan turǵyn úı qırady. «Ál-Ahlı» aýrýhanasynyń aqparaty boıynsha, keminde 11 adam qaza tapqan, olardyń jartysynan kóbi – áıelder men balalar.

«Shıfa» aýrýhanasynyń ókilderi bosqyndar lageri Shatıde tórt adamnyń qaza tapqanyn habarlady. Sondaı-aq Nýseırat lagerindegi bir úıge jasalǵan soqqydan bir otbasynyń toǵyz múshesi kóz jumdy. «Nasser» jáne «Ál-Aýda» aýrýhanalarynyń dereginshe, taǵy alty palestınalyq ońtústik pen ortalyq Gazada kómek izdep júrgende oqqa ushqan.

BUU Bas Assambleıasynyń jalpy debatynda sóılegen sózinde Izraıl premer-mınıstri Bınıamın Netanıahý eli HAMAS-pen kúresti «sońyna deıin jetkizýge tıis» ekenin aıtty. Onyń málimdemesi Assambleıadaǵy eń shıelenisti sátterdiń biri boldy. Bul sóz halyqaralyq delegatsııalardyń jappaı zaldan shyǵýyna jáne Nıý-Iorktegi jappaı narazylyqtarǵa sebep boldy.

Buǵan deıin 12 el Palestınaǵa qarjylaı qoldaý kórsetý jóninde koalıtsııa qurǵany habarlanǵan edi.