Izraıl Gazada oq-dári retinde aq fosfor qoldanǵan
Beısenbi kúni Human Rights Watch quqyq qorǵaý uıymy ızraıldik áskerılerdiń Gaza sektory men Lıvandaǵy bombalaý kezinde aq fosfor qoldanǵanyna dálel tapqanyn habarlady. Quqyq qorǵaýshylar mundaı qarý qoldaný beıbit turǵyndardyń densaýlyǵyna aýyr zardap ákeletinin basa aıtady, dep habarlaıdy Kazinform agenttigi VVS jańalyqtaryna silteme jasap.
Aq fosfor — tez tutanǵysh zat.
Ony áskerıler keıde aýmaqtardy belgileýge paıdalanady, biraq ol qatty kúıik týǵyzýy múmkin jáne adam kóp shoǵyrlanǵan jerde qoldaný óte qaýipti.
Aq fosfor ottegimen janasqanda tutanyp, qoıý aq tútin shyǵarady.
HRW Gaza men Lıvanda túsirilgen aq fosforly artıllerııalyq snarıadtardyń jarylǵanyn kórsetetin foto-kadrlarǵa taldaý jasady.
Sonymen qatar, uıym AFP agenttiginiń Gazada túsirilgen aspandaǵy aq jolaqtardy kórsetetin fotosýretterge de nazar aýdardy.
«Álemdegi eń tyǵyz qonystanǵan aımaqtardyń biri Gazada aq fosfor paıdalaný — beıbit turǵyndar úshin asa qaýipti jáne beıbit turǵyndardy qaýip-qaterge ushyratýǵa tyıym salatyn halyqaralyq gýmanıtarlyq quqyqty buzady», — deıdi quqyq qorǵaýshylar.