Izraıl Gazada qurlyq operatsııasynyń bastalǵanyn jarııalady, Ierýsalımde narazylyq bildirip jatyr

ASTANA. KAZINFORM – Bir kún buryn Izraıl Gaza sektoryna jappaı áýe soqqylaryn jasady, dep habarlaıdy VVS. 

- Sońǵy 24 saǵatta TsAHAL áskeri qaýipsizdik aımaǵyn keńeıtý jáne Gaza sektorynyń soltústik jáne ońtústik bólikterin ishinara bólý maqsatynda Gazanyń ortalyq jáne ońtústiginde nysanaly qurlyq operatsııalaryn bastady, - delingen TsAHAL málimdemesinde.

Izraıl áskeriniń habarlaýynsha, osy operatsııalar aıasynda Izraıl qorǵanys armııasy Gaza sektoryn eki bólikke bóletin Netsarım dáliziniń ortalyq bóligindegi baqylaýdy kúsheıtti. Izraıl áskeri odan atysty toqtatý kelisiminiń birinshi kezeńinde jáne HAMAS ustaǵan kepilge alynǵandardy bosatý kezinde shegindi.

Atysty toqtatýdyń ekinshi kezeńi kúshine engen joq, kelissóz nátıje bermedi.

Sársenbi kúni Ierýsalımde myńdaǵan adam Knesset ǵımaratynan premer-mınıstr Bınıamın Netanıahý rezıdentsııasyna deıin sherýge shyǵyp, Izraıldiń Gaza sektoryna qaıta soqqy berýine jáne úkimettiń el ishindegi áreketterine narazylyq bildirdi. Bul – sońǵy kezde úkimetke qarsy eń iri sherýlerdiń biri.

Sherý bastapqyda Netanıahýdyń ShABAK Jalpy qaýipsizdik qyzmetiniń (sondaı-aq «Shın-Bet» retinde belgili) basshysy Ronen Bardy jumystan shyǵarý áreketine jaýap retinde josparlanǵan bolatyn.

Izraıl Gaza sektoryn bombalaýdy qaıta bastaǵan kezde seısenbide narazylyq sherýlerine shaqyrý kúsheıe tústi. Sherýge HAMAS ustap otyrǵan kepilge alynǵandardyń otbasylary qosyldy. Olar qazirgi jaǵdaıda sodyrlar kepilge alynǵandardy óltiredi dep qaýiptenip, úkimettiń Gazaǵa áskerı qysym jasaýdy jalǵastyrý týraly sheshimin synap otyr.

Izraıldiń shamalaýynsha, bul toptyń qolynda 59 ızraıldik qalyp otyr, onyń 24-i áli tiri sanalady.

Koalıtsııanyń ydyraý qaýpi

Narazylyq bildirýshiler bılikten kepilge alynǵandardyń taǵdyryn ózderiniń saıası aman qalýynan joǵary qoıýdy talap etip otyr.

Keıbir sherýshiler Tel-Avıvti Ierýsalımmen baılanystyratyn Izraıldiń basty tasjolynyń boıynda «Koalıtsııanyń bolashaǵy nemese Izraıldiń bolashaǵy» degen jazýy bar bannerlerdi ustap tur.

- Bizdiń premer-mınıstr janyn satyp jatqanda, biz jaqyn adamdarymyzdy qurban etip jatyrmyz, - dedi tilshilerge «Sapaly úkimet úshin qozǵalys» quqyq qorǵaý uıymynyń tóraǵasy Elıas Shraga sársenbide óz jaqtastarymen birge Knesset ǵımaratyna kelgende.

Osy arada Benıamın Netanıahý bitimgershilikti toqtatý týraly sheshimin sońǵy aptalarda HAMAS-tyń kepilge alynǵandardy qaıtarý jónindegi birqatar usynysty qabyldamaýymen túsindirip otyr. Premer-mınıstrdiń aıtýynsha, olardy tek kúshpen qaıtarýǵa bolatynyn aıtty.

Bir kún buryn halyqqa arnaǵan teledıdarlyq úndeýinde ol úkimet buryn qoıylǵan eki maqsatty júzege asyrýǵa qaıta oralý týraly sheshim qabyldaǵanyn habarlady: kepilge alynǵandardy TsAHAL kúshimen bosatý jáne HAMAS-ty tolyǵymen joıý.

Buǵan deıin HAMAS ókili Izraıl 19 qańtarda atysty toqtatý kelisimi bastalǵannan beri Gaza sektoryna eń qarqyndy soqqylaryn bergennen keıin kelissózder úshin esik jappaǵanyn habarlaǵan.

Osyǵan deıin Netanıahý budan bylaı HAMAS-pen kelissózder tek oq astynda júrgiziletinin málimdegenin jazǵan bolatynbyz.